واشنگٹن: فیلڈ مارشل عاصم منیر اور صدر ٹرمپ کی اہم ملاقات، ایران اسرائیل کشیدگی اور پاک بھارت تناؤ پر تبادلہ خیال
واشنگٹن میں فیلڈ مارشل عاصم منیر نے امریکی صدر ڈونلڈ ٹرمپ سے وائٹ ہاؤس میں اہم ملاقات کی، جس میں تجارت، توانائی، مصنوعی ذہانت، کرپٹو کرنسی، اور ایران اسرائیل کشیدگی سمیت کئی اہم امور پر تبادلہ خیال ہوا۔
آئی ایس پی آر کے مطابق ملاقات میں امریکی وزیر خارجہ سینیٹر مارکو روبیو، مشرق وسطیٰ کیلئے امریکی نمائندہ خصوصی اسٹیو وٹکوف اور پاکستان کے قومی سلامتی کے مشیر بھی موجود تھے۔ ملاقات کابینہ روم میں ظہرانے پر ہوئی، جس کے بعد فیلڈ مارشل نے اوول آفس کا بھی دورہ کیا۔
آئی ایس پی آر کے مطابق صدر ٹرمپ نے فیلڈ مارشل کو بھارت کے ساتھ ممکنہ جنگ کو روکنے میں کردار پر شکریہ ادا کرنے کے لیے مدعو کیا۔ ٹرمپ نے اس ملاقات کو اعزاز قرار دیتے ہوئے کہا کہ پاکستان اور بھارت دونوں جوہری طاقتیں ہیں اور عاصم منیر کی دانشمندانہ قیادت نے خطے کو بڑی تباہی سے بچایا۔
ملاقات میں دو طرفہ تجارت، معدنیات، توانائی، مصنوعی ذہانت اور کرپٹو کرنسی جیسے شعبوں میں اسٹریٹیجک شراکت داری بڑھانے پر بھی بات ہوئی۔ ٹرمپ نے پاکستان کے ساتھ طویل مدتی اسٹریٹیجک تعلقات پر دلچسپی ظاہر کی۔
صدر ٹرمپ اور فیلڈ مارشل کے درمیان ایران اسرائیل تنازع پر بھی تفصیلی گفتگو ہوئی۔ دونوں رہنماؤں نے اس بات پر زور دیا کہ مشرق وسطیٰ میں امن قائم رکھنے کیلئے کشیدگی کا پرامن حل ضروری ہے۔ صدر ٹرمپ نے کہا کہ پاکستان ایران کو باقی دنیا سے بہتر سمجھتا ہے۔
آئی ایس پی آر کے مطابق ایک گھنٹے کی طے شدہ ملاقات دو گھنٹے سے زائد جاری رہی، جس میں صدر ٹرمپ نے فیلڈ مارشل کی قیادت اور فیصلہ کن کردار کی تعریف کی۔ فیلڈ مارشل نے حکومت پاکستان کی جانب سے صدر ٹرمپ کو پاکستان کے دورے کی دعوت بھی دی۔
فوجی ترجمان کے مطابق یہ ملاقات پاک امریکہ تعلقات کو نئی بلندیوں پر لے جانے کی ایک مضبوط بنیاد ہے۔
