قطر کے وزیراعظم محمد بن عبدالرحمان الثانی نے دوحہ پر اسرائیل کے حملے کو سفارتکاری کی توہین اور امن کوششوں کو نقصان پہنچانے کی کوشش قرار دیتے ہوئے کہا ہے کہ اسرائیل حماس رہنماؤں پر حملہ کر کے غزہ میں جنگ ختم کرنے کی کوششوں کو ناکام بنانا چاہتا ہے تاہم قطر غزہ میں جنگ بندی کے لیے اپنی سفارتی کوششیں جاری رکھے گا ۔
سلامتی کونسل کے ہنگامی اجلاس سے خطاب کرتے ہوئے قطری وزیراعظم محمد بن عبدالرحمان الثانی نے اسرائیلی حملے میں ہونے والے جانی و مالی نقصان کی مذمت کی ۔
ان کا کہنا تھا کہ اسرائیل نے دوحہ پر حملہ کرکے سفارتکاری کی توہین کی ہے اور اسرائیل حماس رہنماؤں پر حملہ کر کے غزہ میں جنگ ختم کرنے کی کوششوں کو ناکام بنانا چاہتا ہے ۔
انہوں نے سلامتی کونسل کو یقین دہانی کرائی کہ ان کا ملک غزہ میں جنگ بندی کے لیے اپنی سفارتی کوششیں جاری رکھے گا ۔
ان کا کہنا تھا کہ قطرکا ثالثی کا کردار عالمی سطح پر سراہاگیا، خونریزی روکنے کے لیے اپنے انسانی اور سفارتی کردار کو بغیر کسی ہچکچاہٹ کے جاری رکھیں گے ۔
قبل ازیں قطر کے وزیراعظم نے امریکی ٹی وی کو انٹرویو میں کہا تھا کہ اسرائیلی حملے نے یرغمالیوں کی رہائی کی تمام امیدیں ختم کر دیں اور حماس پر اسرائیلی حملے سے یرغمالیوں کا مستقبل تاریک ہوگیا ہے ۔
یاد رہے کہ 9 ستمبر کو اسرائیل نے قطر کے دارالحکومت دوحہ پر فضائی حملہ کرکے حماس کی مرکزی قیادت کو نشانہ بنایا تھا،حملے میں مرکزی قیادت محفوظ رہی تاہم خلیل الحیہ کے بیٹے سمیت 6 افراد شہید ہوگئے ۔
