کرک کے گورنمنٹ مڈل سکول محمود خیل میں پانی اور بجلی کی سہولت نہ ہونے کی وجہ سے طلباء و طالبات پانی کی بوتلیں اور ہاتھ کے پنکھے گھر سے لانے پر مجبور ہیں ۔
کرک (ابرار خٹک) ویلیج کونسل ڈگر نری کے گورنمنٹ مڈل سکول محمود خیل میں پانی اور بجلی کی سہولت نہ ہونے کے باعث طلبہ و طالبات کو شدید مشکلات کا سامنا ہے ۔
سکول میں پینے کے پانی کا مناسب انتظام نہ ہونے کی وجہ سے بچے روزانہ اپنے گھروں سے پانی کی بوتلیں ساتھ لانے پر مجبور ہیں، جبکہ بجلی کی سہولت نہ ہونے کے باعث گرمی میں طلبہ و طالبات ہاتھ کے پنکھے استعمال کرتے ہیں ۔
سکول میں بنیادی سہولیات کی صورتحال کا اندازہ اس بات سے لگایا جا سکتا ہے کہ کلاس رومز میں بیٹھے بچوں کے ہاتھوں میں کتابوں اور بستوں کے ساتھ پانی کی بوتلیں اور ہاتھ کے پنکھے بھی نظر آتے ہیں ۔
طلبہ و طالبات کا کہنا ہے کہ سکول میں پانی دستیاب نہ ہونے کی وجہ سے انہیں روزانہ گھر سے پانی لانا پڑتا ہے، جبکہ بجلی نہ ہونے سے گرمی کے دوران کلاس رومز میں بیٹھنا بھی مشکل ہو جاتا ہے ۔
سکول کے ہیڈ ماسٹر کے مطابق پانی اور بجلی کی سہولت نہ ہونے سے طلبہ کو مشکلات کا سامنا ہے اور سکول میں سولر سسٹم کی ضرورت ہے تاکہ بجلی کا متبادل انتظام ممکن بنایا جا سکے اور بچوں کو بہتر تعلیمی ماحول فراہم کیا جا سکے ۔
مقامی افراد کے مطابق سکول میں پانی اور بجلی کے مسائل کے حوالے سے کئی مرتبہ منتخب نمائندوں اور انتظامیہ کو آگاہ کیا جا چکا ہے، تاہم تاحال مسئلہ حل نہیں ہو سکا ۔
ان کا کہنا ہے کہ علاقے کے بچوں کو بنیادی تعلیمی سہولیات کی فراہمی ان کا بنیادی حق ہے اور اس مسئلے کو مزید نظرانداز نہیں کیا جانا چاہیے ۔
دوسری جانب بچوں کے والدین اور علاقہ مکینوں نے صوبائی حکومت، منتخب نمائندوں اور متعلقہ حکام سے مطالبہ کیا ہے کہ گورنمنٹ مڈل سکول محمود خیل میں بجلی کے مسئلے کے مستقل حل کے لیے سولر سسٹم فراہم کیا جائے جبکہ پینے کے پانی کے لیے ہینڈ پمپ یا کوئی مناسب ذریعہ نصب کیا جائے، تاکہ طلبہ و طالبات کو بنیادی سہولیات میسر ہوں اور ان کی تعلیم متاثر نہ ہو ۔
