پشاور (خصوصی رپورٹر) — خیبر ٹیلی ویژن نیٹ ورک کے مختلف چینلز نے عید کے موقع پر ناظرین کے لیے رنگارنگ خصوصی شوز پیش کیے، جبکہ پشاور پریس کلب اور خیبر یونین آف جرنلسٹس کے اعزاز میں پشاور اسٹیشن کے مختار بھائی آڈیٹوریم میں ایک خصوصی عید شو کا انعقاد بھی کیا گیا۔
اس خصوصی شو کی میزبانی جمشید علی خان، زکی الرحمن اور مینہ شمس نے کی۔ تقریب میں پشاور پریس کلب اور خیبر یونین آف جرنلسٹس کے نو منتخب عہدیداران سمیت دیگر صحافیوں نے شرکت کی۔ اس کے علاوہ شفیع اللہ جان، ترجمان وزیراعلیٰ خیبرپختونخوا، سیکرٹری اطلاعات اور ڈائریکٹر جنرل اطلاعات بھی اس موقع پر موجود تھے۔
پروگرام میں معروف کامیڈین شہنشاہ آفریدی اور رخسار نے مزاحیہ خاکہ پیش کیا جبکہ نامور رباب نواز شاہد ملنگ اور دیگر فنکاروں نے بھی اپنی پرفارمنس سے شرکاء کو محظوظ کیا۔ حاضرین نے فنکاروں کی پرفارمنس کو خوب سراہا اور بھرپور انجوائے کیا۔
اس موقع پر شفیع اللہ جان اور سینئر جرنلسٹ و چیئرمین پریس کلب ایم ریاض نے خیبر نیٹ ورک کا خصوصی شکریہ ادا کیا اور امید ظاہر کی کہ آئندہ بھی ایسے خوشی کے مواقع پر انہیں یاد رکھا جائے گا۔
