خیبرپختونخوا کے مختلف علاقوں میں سیکیورٹی فورسز نے کارروائیاں کی ہیں جس کے دوران 19 دہشتگرد ہلاک ہوگئے ہیں جبکہ فائرنگ کے تبادلے میں پاک فوج کے 3 جوان شہید ہو چکے ہیں ۔
آئی ایس پی آر کے مطابق دہشتگردوں کی موجودگی کی خفیہ اطلاع پرسیکورٹی فورسز کی جانب سے پشاور کے علاقے متنی میں آپریشن کیا گیا اور اس دوران سیکیورٹی فورسزنے دہشتگردوں کے ٹھکانے کو مؤثر طریقے سے نشانہ بنایا ، کارروائی میں 8 دہشتگرد ہلا ہو گئے ۔
آئی ایس پی آر نے کہا ہے کہ دوسری کارروائی ضلع مہمند کے علاقے بائیزئی میں کی گئی اور اس کارروائی میں بھی 8 دہشتگردوں کو ہلاک کیا گیا ۔
آئی ایس پی آر کا مزید بتانا تھا کہ تیسری کارروائی کرک میں کی گئی جہاں دہشتگردوں کے مقام کو مؤثر انداز سے نشانہ بنایا گیا اور فائرنگ کے نتیجے میں 3 دہشتگرد ہلاک ہوئے ۔
آئی ایس پی آر نے مزید کہا ہے کہ دہشتگردوں کے ساتھ شدید فائرنگ کے تبادلے کے دوران تین بہادر بیٹے شہید ہو گئے ہیں ،شہید ہونے والوں میں لانس حوالدار عباس علی، نائیک محمد نذیر، نائید محمد عثمان شامل ہیں ۔
آئی ایس پی آر نے بتایا کہ علاقے میں پائے جانے والے دہشتگردوں کو ختم کرنے کے لیے کارروائیاں کی جا رہی ہیں ،پاکستان کی سیکیورٹی فورسز ملک سے دہشت گردی کی لعنت کو ختم کرنے کے لیے پرعزم ہیں ۔
