خیبرپختونخوا کے دو اضلاع میں سیکورٹی فورسز کی کارروائی کے نتیجے میں بھارتی حمایت یافتہ 31 دہشت گرد ہلاک ہوگئے، آئی ایس پی آر کے مطابق کارروائیاں لکی مروت اور بنوں میں خفیہ اطلاع کی بنیاد پر دہشتگردوں کی موجودگی پر کی گئیں ۔
پاک فوج کے شعبہ تعلقات عامہ کی جانب سے جاری بیان کے مطابق 13 اور 14 ستمبر کو سیکیورٹی فورسز نے خیبرپختونخوا میں 2 مختلف کارروائیاں کیں جس کے نتیجے میں بھارتی پراکسی سے منسلک 31 دہشت گرد ہلاک کردیئے گئے ۔
ترجمان پاک فوج کا کہنا تھا کہ ضلع لکی مروت میں انٹیلی جنس بنیاد پر آپریشن کیا گیا جس میں سیکیورٹی فورسز نے دہشتگردوں کے ٹھکانوں کو موثر انداز میں نشانہ بنایا ۔
آئی ایس پی آر نے مزید بتایا کہ لکی مروت میں دہشت گردوں سے شدید فائرنگ کے تبادلے کے بعد 14 بھارتی پراکسی یافتہ دہشتگردوں کو ہلاک کیا گیا ۔
ترجمان پاک فوج کے مطابق سیکیورٹی فورسز کی جانب سے دوسری کارروائی ضلع بنوں میں کی گئی، جہاں سیکیورٹی فورسز نے فائرنگ کے تبادلے میں مزید 17 خارجی دہشت گردوں کو ہلاک کردیا ۔
آئی ایس پی آر کے بیان کے مطابق کسی بھی بھارتی سرپرست خوارج کے خاتمے کے لیے علاقے میں کلیئرنس آپریشن جاری ہے، ملک سے بھارتی سرپرستی میں دہشت گردی کی لعنت کو مکمل طورپر ختم کیا جائے گا ۔
