پشاور (خصوصی رپورٹر): معروف پشتو گلوکار بہادر زیب نے اخبار خیبر سے گفتگو کرتے ہوئے کہا کہ خیبر ٹیلی ویژن کے خصوصی شو “گل زما د خاورے” میں جس پروقار انداز میں ان کے والد احمد گل کی 60 سالہ فنی خدمات کو خراجِ تحسین پیش کیا گیا، وہ قابلِ ستائش ہے۔
انہوں نے مزید کہا کہ فلاحی تنظیم خودمختار ساوی کی جانب سے ان کے والد کی مالی معاونت بھی کی گئی، جس پر وہ خیبر ٹیلی ویژن نیٹ ورک کی اعلیٰ انتظامیہ اور پشاور اسٹیشن کے تمام عملے کے بے حد شکر گزار ہیں۔
بہادر زیب نے کہا کہ صوبہ بھر کے گلوکار اور موسیقار بھی خیبر ٹیلی ویژن کے اس اقدام کو سراہتے ہیں۔ ان کے مطابق وہ کام جو حکومتی سطح پر متعلقہ اداروں کو کرنا چاہیے تھا، وہ خیبر ٹیلی ویژن نے انجام دے کر ایک مثبت مثال قائم کی ہے۔
انہوں نے یہ بھی کہا کہ فنکار امن اور محبت کے پیامبر ہوتے ہیں، اور جہاں فنکاروں کی قدر کی جاتی ہے وہاں معاشرے میں امن اور ہم آہنگی فروغ پاتی ہے۔
