وزیر اعلیٰ خیبر پختونخوا محمد سہیل آفریدی نے سابق وزیر اعظم عمران خان کے کیس کی سماعت کے بعد سپریم کورٹ کے باہر پریس کانفرنس سے خطاب کرتے ہوئے عمران خان رہائی فورس کے قیام کا اعلان کیا۔
انہوں نے کہا کہ عدالتی احکامات کی مسلسل خلاف ورزی کے بعد اب منظم عوامی جدوجہد ناگزیر ہو چکی ہے۔ ان کے مطابق یہ فورس ایک اسٹریٹ موومنٹ کی تیاری کے طور پر قائم کی جا رہی ہے، جو آئینی اور جمہوری دائرے میں رہتے ہوئے اپنی سرگرمیاں انجام دے گی۔
محمد سہیل آفریدی نے بتایا کہ عمران خان رہائی فورس کے لیے ملک بھر میں نوجوانوں کی ممبرشپ کی جائے گی۔ اس فورس میں آئی ایس ایف، انصاف یوتھ ونگ، وومن ونگ، مائنارٹی ونگ، پروفیشنلز اور ہر مکتبہ فکر سے تعلق رکھنے والے افراد کو شامل کیا جائے گا۔
انہوں نے کہا کہ ممبرشپ کارڈز چار سے پانچ دن میں تیار ہو جائیں گے جبکہ عید کے بعد پشاور میں نوجوانوں سے باقاعدہ حلف لیا جائے گا۔
انہوں نے مزید کہا کہ تحریک کے لیے مضبوط چین آف کمانڈ تشکیل دی جائے گی اور ہر ہدایت عمران خان کی نامزد قیادت کے ذریعے جاری ہوگی۔
سہیل آفریدی کا کہنا تھا کہ یہ جدوجہد حقیقی آزادی، آئین و قانون کی بالادستی، جمہوریت اور آزاد میڈیا کے تحفظ کے لیے کی جا رہی ہے۔
وزیر اعلیٰ خیبر پختونخوا نے کہا کہ صوبے کے عوام نے صبر اور وفاداری کا ثبوت دیا ہے اور آج بھی عمران خان کے ساتھ کھڑے ہیں۔ انہوں نے اس بات پر زور دیا کہ پاکستان تحریک انصاف عدالتی احکامات کی مکمل پابندی کرتی ہے اور اپنی سیاسی جدوجہد آئینی حدود میں رہتے ہوئے جاری رکھے گی۔
