نیویارک: وفاقی وزیر داخلہ محسن نقوی نے اقوام متحدہ کے ہیڈ کوارٹرز کا دورہ کیا۔
وزیر داخلہ نے اقوام متحدہ کے سیکرٹری جنرل انتونیو گوتریس سے ملاقات کی۔
ملاقات کے دوران علاقائی صورتحال اور بین الاقوامی امور پر تبادلہ خیال کیا گیا۔
اس موقع پر مغربی ایشیا میں تنازعات کے خاتمے کے لیے پاکستان کی ثالثی کی کوششوں اور اقوام متحدہ کے قیامِ امن مشنز میں پاکستان کی خدمات پر بھی گفتگو ہوئی۔
اقوام متحدہ کے سیکرٹری جنرل انتونیو گوتریس نے عالمی امن اور سلامتی کے فروغ کے لیے اقوام متحدہ کے قیامِ امن مشنز میں پاکستان کے طویل المدتی تعاون اور امن کے لیے اس کی کاوشوں کو سراہا۔
وفاقی وزیر داخلہ محسن نقوی نے کہا کہ چیلنجز کے باوجود پاکستان نے علاقائی امن و استحکام کو فروغ دینے اور انسانی جانوں کے تحفظ کے لیے ذمہ داری سے کردار ادا کیا، جس میں فیلڈ مارشل اور وزیراعظم شہباز شریف کی کاوشیں قابلِ تحسین ہیں۔
انہوں نے کہا کہ امن مشنز کی کامیابی کے لیے حقیقت پسندانہ مینڈیٹ اور درکار وسائل کی فراہمی ضروری ہے۔
