پشاور (خصوصی رپورٹر) — عالمی شہرت یافتہ سارندہ نواز منیر سرحدی کی 46ویں برسی خاموشی سے منائی گئی، جس پر فن موسیقی سے وابستہ حلقوں نے انہیں بھرپور خراجِ عقیدت پیش کیا۔
مرحوم کے والد استاد پذیر خان آل انڈیا ریڈیو کے معروف سارندہ نواز تھے۔ منیر سرحدی 1928 میں نوشہرہ میں پیدا ہوئے اور انہوں نے اپنے والد کے ساتھ ساتھ غفار حیدر بریلوی اور افضل لکھنوی سے بھی موسیقی کی تربیت حاصل کی۔
انہوں نے دنیا بھر میں پاکستان کی نمائندگی کرتے ہوئے سارندہ نواز کے طور پر اپنی منفرد شناخت قائم کی اور 1978 میں حکومتِ پاکستان کی جانب سے تمغہ حسنِ کارکردگی سے بھی نوازے گئے۔
منیر سرحدی نے تقریباً نصف صدی تک موسیقی کے میدان میں خدمات انجام دیں اور 23 مئی 1980 کو وفات پائی۔
ان کے صاحبزادے اعجاز سرحدی بھی عالمی شہرت یافتہ سارندہ نواز ہیں جو اپنے والد کی موسیقی کی روایت کو آج بھی زندہ رکھے ہوئے ہیں۔
