اسلام آباد: وزیراعظم محمد شہباز شریف نے کہا ہے کہ برآمدات پر مبنی ترقیاتی اہداف کا حصول ہماری اولین ترجیح ہے۔
نیشنل ٹیرف کمیشن کی فعال اور شفاف کارکردگی ملکی صنعت، تجارت اور سرمایہ کاری کے فروغ کے لیے ناگزیر ہے۔
ان خیالات کا اظہار انہوں نے معیشت کی مجموعی ترقی اور نیشنل ٹیرف پالیسی 2025-30 کے نفاذ پر اہم جائزہ اجلاس کی صدارت کرتے ہوئے کیا۔
وزیراعظم نے ہدایت کی کہ سرمایہ کاروں اور صنعت کاروں کی سہولت کے لیے نیشنل ٹیرف کمیشن اپنا فعال کردار ادا کرے۔
انہوں نے کہا کہ دنیا میں رائج بہترین اطوار اور جدید ٹیکنالوجی، بشمول انفارمیشن ٹیکنالوجی اور مصنوعی ذہانت، کا استعمال کرتے ہوئے کمیشن میں جدت لائی جائے۔
اجلاس میں نیشنل ٹیرف پالیسی 2025-30 کے نفاذ کے حوالے سے بریفنگ دی گئی۔
بریفنگ میں بتایا گیا کہ نیشنل ٹیرف پالیسی کے تحت مختلف شعبوں کے لیے ٹیرف میں مرحلہ وار کمی کی جائے گی، جس کا مقصد برآمدات پر مبنی اقتصادی ترقی کے اہداف کا حصول ہے۔
لاجسٹک شعبے کی ترقی اور فروغ کے لیے ریفریجریٹڈ کنٹینرز اور سیمی ٹریلرز پر عائد ڈیوٹیز ختم کی جائیں گی۔
بریفنگ میں یہ بھی بتایا گیا کہ تعمیراتی شعبے کے فروغ کے لیے اسپیشلائزڈ وہیکلز اور مشینری پر کسٹمز ڈیوٹیز کم کی جا رہی ہیں۔
فارماسیوٹیکل سیکٹر کو سہولیات دینے کے لیے خام مال، خصوصاً کینسر کی ادویات میں استعمال ہونے والے خام مال پر کسٹم ڈیوٹی ختم کی جائے گی۔
