ایبٹ آباد کے ویمن اینڈ چلڈرن ہسپتال کی نرسری سے 17 روزہ نومولود بچے کے اغوا کا واقعہ پیش آیا ہے، جس کے بعد پولیس نے فوری طور پر تحقیقات شروع کر دی ہیں۔
ابتدائی معلومات کے مطابق سی سی ٹی وی فوٹیج میں ایک خاتون کو نومولود بچے کو لے جاتے ہوئے دیکھا گیا ہے، جس کی بنیاد پر پولیس نے تلاش اور شناخت کا عمل تیز کر دیا ہے۔
واقعے کے بعد ڈپٹی کمشنر ایبٹ آباد سرمد سلیم اکرم نے فوری نوٹس لیتے ہوئے انکوائری ٹیم تشکیل دے دی ہے اور ذمہ داران کے تعین کے لیے مکمل تحقیقات کا حکم دیا ہے۔
پولیس حکام کو مغوی بچے کی جلد بازیابی کے لیے خصوصی ہدایات جاری کی گئی ہیں، جبکہ ہسپتال انتظامیہ نے بھی واقعے کی اندرونی چھان بین شروع کر دی ہے۔
اس افسوسناک واقعے نے والدین اور شہریوں میں تشویش کی لہر دوڑا دی ہے، اور ہسپتال کی سیکیورٹی پر بھی سوالات اٹھنے لگے ہیں۔
ضلعی انتظامیہ نے یقین دہانی کرائی ہے کہ بچے کی بازیابی اور ذمہ داروں کے خلاف سخت کارروائی کی جائے گی۔
