خیبرپختونخوا کے قبائلی اضلاع میں بھی سیکیورٹی فورسز کی کامیاب کارروائیاں جاری ہیں ،ضلع شمالی وزیرستان میں کارروائی کے دوران فتنہ الخوارج سے تعلق رکھنے والے 11 دہشتگردوں کو ہلاک کردیا، آئی ایس پی آر کے مطابق ہلاک دہشتگردوں کے قبضے سے اسلحہ اور گولہ بارود بھی برآمد کیا گیا ۔
پاک فوج کے شعبہ تعلقات عامہ کی جانب سے جاری بیان کے مطابق سیکیورٹی فورسز نے خفیہ کی اطلاعات کی بنیاد پر شمالی وزیرستان کے علاقے دتہ خیل میں دہشتگردوں کے متعدد ٹھکانوں کو نشانہ بنایا ۔
آئی ایس پی آر کے مطابق شدید اور بھرپور فائرنگ کے تبادلے کے بعد بھارت کی سرپرستی میں قائم فتنہ الخوارج سے تعلق رکھنے والے 11 دہشتگردوں کو ہلاک کردیا گیا ۔
ہلاک ہونے والے بھارتی حمایت یافتہ دہشتگردوں سے اسلحہ اور گولہ بارود بھی برآمد کیا گیا ہے، یہ عناصر علاقے میں متعدد دہشتگرد کارروائیوں میں سرگرم رہے تھے ۔
بیان میں کہا گیا ہے کہ علاقے میں چھپے ہوئے دہشتگردوں کے خاتمے کے لیے کلیئرنس اور سرچ آپریشنز جاری ہیں ۔
آئی ایس پی آر نے کہاکہ عزمِ استحکام وژن کے مطابق سیکیورٹی فورسز اور قانون نافذ کرنے والے اداروں کی جانب سے دہشتگردی کے خلاف بلاامتیاز کارروائیاں پوری قوت کے ساتھ جاری رہیں گی تاکہ ملک سے بیرونی سرپرستی میں ہونے والی دہشتگردی کے ناسور کا مکمل خاتمہ کیا جا سکے ۔
