پشاور میں طویل لوڈشیڈنگ کی وجہ سے عوام شدید غصے کا شکار ہے۔اس شدید ترین گرمی کے موسم میں جدھر درجہ حرارت 40 تک جا پہنچا ہو وہاں پر لوڈشیڈنگ نے عوام کا جینا محال کررکھا ہے۔دوسری طرف بجلی کم وولٹیج اور لوڈشیڈنگ کی وجہ سے گھرکی قیمتی اشیا بھی ناکارہ ہو رہی ہیں۔
شہریوں کے مطابق پشاور شہر اور آس پاس کے علاقوں میں طویل لوڈشیڈنگ اور ٹرپنگ کا سلسلہ ختم ہونے کا نام ہی نہیں لے رہا۔بار بار بجلی کے آنے جانے سے قیمتی گھریلو برقی آلات بھی خراب ہورہے ہیں۔عوام کے مطابق حکومت ہر طرف سے عوام پر ظلم کر رہی ہے، پہلے ظالمانہ لوڈشیڈنگ کی وجہ سے عوام کو ذہنی طور پر پریشان کئے رکھا اور اب مالی طور پر نقصان ہورہا ہے۔عوام کے مطابق مغرب سے لے کر فجر تک ہر دس منٹ بعد دس منٹ کی لوڈشیڈنگ کا نیا فارمولا عوام پر آزمایا جا رہا ہے جس کی وجہ سے نہ دن کو سکون ملتا ہے اور نہ ہی رات کو چین آتا ہے۔ملک میں جاری شدید گرمی کے باوجود بجلی کی طویل ترین لوڈشیڈنگ اور ٹرپنگ کے خلاف پشاور سمیت کے پی کے مختلف اضلاع میں احتجاجی مظاہرے بھی کئے گئے ہیں اور اس کے ساتھ ہی سڑکیں بھی بند کردی گئیں ہیں۔پشاور میں لوگوں نے احتجاج کرتے ہوئے رامداس چوک کو مکمل طورپر بند کردیا تھا جس کی وجہ سے ٹریفک کا نظام مکمل طورپر دررہم برہم ہو گیا تھا ۔
