پشاور (حسن علی شاہ) — گزشتہ دو ماہ کے دوران پٹرولیم مصنوعات کی قیمتوں میں مسلسل اور ناقابل برداشت اضافہ نے عوام کی زندگی کو شدید متاثر کیا ہے۔ اچانک پیٹرول کی قیمتوں میں اضافے کے اعلان کے بعد ملک بھر خصوصاً خیبرپختونخوا میں شدید غم و غصے کی لہر دوڑ گئی۔
عوامی حلقوں کا کہنا ہے کہ خیبرپختونخوا اس وقت سب سے زیادہ متاثرہ صوبہ ہے، حالانکہ اس کے جنوبی اضلاع میں گیس اور تیل کے وافر ذخائر موجود ہیں۔ ان ذخائر میں اضافے کے اعلانات بھی وقتاً فوقتاً وفاقی حکومت کی جانب سے کیے جاتے رہے ہیں، تاہم زمینی حقیقت یہ ہے کہ مقامی آبادی کو نہ تو گیس کی مناسب فراہمی میسر ہے اور نہ ہی پٹرول آسانی سے دستیاب ہے۔
دوسری جانب ملک بھر میں غیر اعلانیہ اور ناروا لوڈ شیڈنگ نے عوام کی مشکلات میں مزید اضافہ کر دیا ہے، جس کے باعث متوسط اور غریب طبقہ شدید دباؤ کا شکار ہے۔ عوامی حلقوں میں یہ تاثر بڑھ رہا ہے کہ مہنگائی اور توانائی بحران نے عام شہری کی زندگی کو بری طرح متاثر کر دیا ہے۔
