اسلام آباد: دفتر خارجہ نے کہا ہے کہ افغانستان کے ناظم الامور کو وزارت خارجہ طلب کیا گیا۔
ناظم الامور کو بنوں میں فتح خیل پولیس پوسٹ پر ہونے والے دہشت گرد حملے کے خلاف شدید احتجاج ریکارڈ کرایا گیا۔
ترجمان دفتر خارجہ کے مطابق 9 مئی 2026 کو فتنہ الخوارج کے دہشت گردوں نے بارود سے بھری گاڑی کے ذریعے خیبر پختونخوا کے ضلع بنوں میں فتح خیل پولیس پوسٹ کو نشانہ بنایا۔
جس کے نتیجے میں 15 پولیس اہلکار شہید جبکہ 4 افراد زخمی ہوئے جن میں ایک شہری بھی شامل ہے۔
دفتر خارجہ کے مطابق واقعے کی تفصیلی تحقیقات، حاصل شدہ شواہد اور تکنیکی انٹیلی جنس سے یہ بات سامنے آئی ہے کہ حملے کی منصوبہ بندی افغانستان میں موجود دہشت گردوں نے کی۔
پاکستان نے افغان سرزمین کو مسلسل پاکستان کے خلاف دہشت گردی کے لیے استعمال کیے جانے پر شدید تشویش کا اظہار کرتے ہوئے افغان حکام پر واضح کیا کہ پاکستان اس بربریت کے ذمہ دار عناصر کے خلاف فیصلہ کن کارروائی کا حق محفوظ رکھتا ہے۔
دفتر خارجہ نے مزید کہا کہ افغان طالبان حکومت کو واضح طور پر آگاہ کردیا گیا ہے کہ اگر اس نے ان دہشت گرد تنظیموں کو پناہ دینا جاری رکھا تو پاکستان اپنی قومی سلامتی اور شہریوں کے تحفظ پر کسی قسم کا سمجھوتہ نہیں کرے گا۔
