پشاور میں پاکستان پیپلز پارٹی کے سابق صوبائی صدر ظاہر علی شاہ نے کہا ہے کہ پارٹی کو سب سے زیادہ نقصان اپنے ہی لوگوں نے پہنچایا۔ ان کے مطابق گزشتہ دس برسوں میں اندرونی اختلافات پارٹی کی کمزوری کی بڑی وجہ بنے۔
کارکنوں کے اجلاس سے خطاب کرتے ہوئے انہوں نے کہا کہ گروپ بندی اور باہمی چپقلش نے پارٹی کو ناقابل تلافی نقصان دیا۔ اس صورتحال سے سیاسی مخالفین کو فائدہ ہوا اور تنظیم اپنی اصل طاقت کھو بیٹھی۔
انہوں نے کہا کہ بطور صوبائی صدر اور وزیر، انہوں نے کارکنوں کے لیے روزگار کے مواقع پیدا کیے اور اپنے حلقے میں ترقیاتی منصوبے مکمل کرائے۔ سوات میں دہشتگردی سے متاثرہ خاندانوں کے لیے پناہ گاہیں، امدادی چیک اور دیگر سہولیات بھی فراہم کی گئیں، مگر ان اقدامات کو نظر انداز کر دیا گیا۔
ان کا کہنا تھا کہ پارٹی کے اندر بعض عناصر نے باہر کے لوگوں کو ترجیح دی، جس سے بانی رہنماؤں کی قربانیوں کو بھی نظر انداز کیا گیا۔ انہوں نے زور دیا کہ اب بھی وقت ہے کہ تمام اختلافات ختم کر کے ایک پلیٹ فارم پر اکٹھے ہوں۔
ظاہر علی شاہ نے امید ظاہر کی کہ آئندہ انتخابات میں پاکستان پیپلز پارٹی پشاور سمیت پورے صوبے میں نمایاں کامیابی حاصل کرے گی۔ انہوں نے کہا کہ بلاول بھٹو زرداری پارٹی کی قیادت کے حقیقی وارث ہیں اور مشترکہ کوششوں سے وہ ملک کے وزیراعظم بن سکتے ہیں۔
