وزیرِ اعظم محمد شہباز شریف امریکی صدر ڈونلڈ ٹرمپ کی دعوت پر بورڈ آف پیس کے اجلاس میں شرکت کے لیے امریکہ کے دورے پر واشنگٹن پہنچ گئے۔ اس اہم سفارتی دورے میں پاکستان کے اعلیٰ سطحی وفد بھی وزیرِ اعظم کے ہمراہ ہے، جس میں نائب وزیرِ اعظم و وزیرِ خارجہ اسحاق ڈار، وزیرِ خزانہ محمد اورنگزیب، وزیرِ اطلاعات و نشریات عطاء اللہ تارڑ اور معاون خصوصی طارق فاطمی شامل ہیں۔
وزیرِ اعظم آج واشنگٹن میں منعقدہ بورڈ آف پیس کے اجلاس میں شرکت کریں گے، جہاں عالمی امن، باہمی تعاون اور خطے کی صورتحال پر تبادلۂ خیال کیا جائے گا۔ ذرائع کے مطابق اس موقع پر وزیرِ اعظم کی اعلیٰ امریکی حکام سے اہم ملاقاتیں بھی متوقع ہیں، جن میں دوطرفہ تعلقات، معاشی تعاون اور سیکیورٹی امور پر گفتگو کی جائے گی۔
یہ دورہ عالمی امن کے قیام کے لیے بورڈ آف پیس میں پاکستان کی فعال رکنیت اور بین الاقوامی سطح پر پاکستان کے مثبت و مؤثر کردار کی عکاسی کرتا ہے۔ ماہرین کے مطابق حالیہ سفارتی کامیابیاں پاکستان کی خارجہ پالیسی میں توازن اور اعتماد کا مظہر ہیں، جو عالمی برادری میں ملک کی ساکھ کو مزید مستحکم کر رہی ہیں۔
وزیرِ اعظم کا یہ دورہ پاکستان اور امریکہ کے تعلقات میں بہتری اور عالمی امن کے فروغ کی جانب ایک اہم پیش رفت قرار دیا جا رہا ہے۔
