بانی پی ٹی آئی کی ہمشیرہ علیمہ خان کو لاہور میں 3 ایم پی او کے تحت گرفتار کر لیا گیا ، ذرائع کے مطابق گرفتاری کے بعد علیمہ خان کو کوٹ لکھپت جیل منتقل کر دیا گیا ہے، دوسری جانب پی ٹی آئی چیئرمین بیرسٹر گوہر نے تصدیق کی ہے کہ علیمہ خان کی گرفتاری کے بارے میں نورین خان نے انہیں آگاہ کیا ،بیرسٹر گوہر کے مطابق اس اقدام سے کشیدگی میں مزید اضافہ ہوگا ۔
لاہور: پی ٹی آئی پارٹی ذرائع کے مطابق علیمہ خان کو اپر مال واقع ان کے گھر سے جم جاتے ہوئے لٹن روڈ پولیس نے حراست میں لے لیا ۔
ذرائع کے مطابق علیمہ خان کی گاڑی لٹن روڈ تھانے میں کھڑی ہے اور انہیں کوٹ لکھپت جیل منتقل کر دیا گیا، دوسری جانب نورین نیازی نے بتایا ہے کہ علیمہ خان جیسے ہی گھر سے باہر نکلیں تو انہیں حراست میں لے لیا گیا ۔
انہوں نے کہا کہ ہم ایسے اقدامات سے نہیں ڈرتے اور اپنے بھائی کے لیے جدوجہد جاری رکھیں گے، ادھر پی ٹی آئی چیئرمین بیرسٹر گوہر نے علیمہ خان کی نظر بندی کی مذمت کی ہے ۔
بیرسٹر گوہر نے کہا کہ ہمارا مارچ پرامن اور سیاسی ہوگا،مقصد آئینی اور سیاسی مطالبات کے لیے پرامن جدوجہد کرنا ہے، چیئرمین پی ٹی آئی نے یہ بھی کہا کہ ہم ہر قسم کے تشدد کے خلاف ہیں ۔
