سکیورٹی فورسز نے قلات کے قریب کامیاب کارروائی کی ہے جس کے نتیجے میں 5 دہشتگرد ہلاک ہوگئے،آئی ایس پی آر کے مطابق کارروائی میں دہشتگردوں کی جانب سے اغوا کئے گئے 23 افراد بھی بحفاظت بازیاب کرالئے گئے ہیں ۔
پاک فوج کے شعبہ تعلاقات عامہ کی جانب سے جاری بیان کے مطابق قلات کے قریب این 25 پر دہشتگردوں کی عوامی آمدورفت میں خلل ڈالنے کی کوشش ناکام بنا دی گئی ۔
آئی ایس پی آر کے مطابق سکیورٹی فورسز نے بروقت کارروائی کرتے ہوئے 5 دہشتگردوں کو ہلاک کر دیا، ہلاک دہشتگردوں کے ٹھکانے سے 23 مغوی بحفاظت بازیاب کروا لیے گئے ۔
آئی ایس پی آر کا کہنا ہے کہ دہشت گردوں کے ٹھکانے سے 6 ٹرک، 3 بسیں اور 2 کاریں برآمد کر لی گئیں، جبکہ بڑی تعداد میں اسلحہ، گولہ بارود اور دھماکا خیز مواد بھی قبضے میں لے لیا گیا ۔
آئی ایس پی آر کے بیان میں مزید کہا گیا ہے کہ دہشت گردوں نے اغوا، بھتہ خوری اور گاڑیاں چھیننے کیلئے چیک پوسٹ قائم کر رکھی تھی ۔
