اسلام آباد میں امن و امان سے متعلق منعقدہ اجلاس سے گفتگو کرتے ہوئے وزیراعظم شہباز شریف نے کہا ہے کہ پاکستان تحریک انصاف سیاسی جماعت نہیں بلکہ فتنہ ہے، تخریب کاری کا ایک جتھہ ہے، ان جتھوں کے خلاف مقدمات درج کیے جائیں۔
وزیراعظم شہباز شریف کا کہنا مزید تھا کہ یہ وفاق کے خلاف چوتھی لشکرکشی ہے، ریاست کے خلاف اس طرح کے ناپاک عزائم کا 2014 سے پہلے کوئی سوچ بھی نہیں سکتا تھا، ڈی چوک پر 126 دن پاکستان کی رسوائی اور معیشت کی تباہی کی گئی اور دھرنےکے باعث چینی صدر کا دورہ بھی منسوخ ہوا تھا۔ اس جتھے نے ایک بار پھر تباہی کی، 4 رینجرز اور ایک پولیس اہلکار شہید ہوا۔
ان کا کہنا تھاکہ احتجاج اور دھرنوں سے پاکستان کی معیشت کویومیہ 190 ارب روپےکانقصان ہوتاہے، دنیا کے سامنے جو تماشہ لگایا گیا اسے لفظوں میں بیان نہیں کیا جاسکتا۔ وزیراعظم کا کہنا تھاکہ ایسی مذموم سوچ میں نے کسی اور سیاسی جماعت میں نہیں دیکھی، اسلام آباد میں چڑھائی کرنی ہےچاہے پاراچنار میں خون کی ندیاں بہہ رہی ہوں۔
انہوں نے کہا کہ اکتوبرمیں چینی وزیراعظم کے دورے کے دوران بھی احتجاج کیا گیا، اس سے بڑی پاکستان کے ساتھ دشمنی اورکیا ہوسکتی ہے؟ ان کو کوئی احساس نہیں کہ دوست ممالک یہاں پرسرمایہ کاری کرنا چاہتےہیں، ان کا ایک ہی ایجنڈا ہے کہ پاکستان کو تباہ کیا جائے۔
