پشاور: وزیراعلیٰ خیبر پختونخوا علی امین گنڈاپور نے آج پارلیمانی پارٹی کا اجلاس طلب کر لیا ہے۔ ذرائع کے مطابق یہ اجلاس آج شام وزیراعلیٰ ہاؤس میں ہوگا۔
ذرائع کے مطابق اجلاس میں ڈی چوک پر احتجاج کے بعد کی صورتحال پر غور کیا جائے گا، اور بشریٰ بی بی کو سیاست سے دور رکھنے پر بھی مشاورت کی جائے گی۔ اجلاس میں خیبر پختونخوا کے ارکان قومی اسمبلی کو بھی دعوت دی گئی ہے۔ وزیراعلیٰ اس اجلاس میں پی ٹی آئی پارلیمانی پارٹی کو اعتماد میں لیں گے اور موجودہ سیاسی حالات کے حوالے سے اہم فیصلے متوقع ہیں۔
خیال رہے کہ گزشتہ روز شام کو پی ٹی آئی کور کمیٹی کا ہنگامی اجلاس ہوا تھا۔ یہ اجلاس وفاقی کابینہ کے اجلاس میں اراکین کی جانب سے پختونخوا میں گورنر راج لگانے کی حمایت کی خبروں کے بعد ہوا۔ علاوہ ازیں احتجاج میں ناکامی پر پی ٹی آئی میں اختلافات شدت اختیار کرگئے ہیں۔
