خیبر پختونخوا کے بیشتر اضلاع میں 30 دسمبر سے یکم جنوری کے دوران گرج چمک کے ساتھ بارش جبکہ بالائی پہاڑی علاقوں میں برفباری کی پیشگوئی کی گئی ہے۔ دوسری جانب وادی سوات کے مختلف علاقوں میں برفباری جاری ہے۔
پشاور: پی ڈی ایم اے ایڈوائزری کے مطابق موسمی صورتحال کے پیش نظر پروونشل ایمرجنسی آپریشن سنٹر کی جانب سے تمام متعلقہ ضلعی انتظامیہ اور اداروں کو پیشگی حفاظتی اقدامات کے لیے الرٹ جاری کر دیا گیا ہے۔
ایڈوائزری میں بتایا گیا ہے کہ چترال، دیر، سوات، شانگلہ، کوہستان، کولائی پالس، مالاکنڈ، بونیر، مانسہرہ، بٹگرام، طورغر، ایبٹ آباد، ہری پور، کرم، خیبر، باجوڑ اور مہمند میں 30 دسمبر سے یکم جنوری تک گرج چمک کیساتھ وقفے وقفے سے بارش کا امکان ہے۔
اسی دوران صوابی، مردان، نوشہرہ، پشاور، چارسدہ، کوہاٹ، ہنگو، اورکزئی، کرک، بنوں، لکی مروت، ٹانک، ڈی آئی خان اور شمالی و جنوبی وزیرستان میں بھی بارش متوقع ہے۔
ممکنہ برفباری کے باعث ناران، کاغان، دیر، سوات، مالاکنڈ، کوہستان، مانسہرہ، ایبٹ آباد، شانگلہ اور گلیات میں سڑکیں بند ہونے یا پھسلن کا شکار ہونے کا خدشہ ہے، جبکہ پہاڑی علاقوں میں لینڈ سلائیڈنگ اور برفانی تودے گرنے کا خطرہ بھی موجود ہے۔
پی ڈی ایم اے نے سیاحوں اور مسافروں سے اپیل کی ہے کہ دورانِ برفباری سفر کرتے وقت پانی، خوراک، ادویات اور گرم کپڑے وافر مقدار میں ساتھ رکھیں۔ عوام کو ہدایت کی گئی ہے کہ تیز ہوا اور گرج چمک کے دوران بجلی کے کھمبوں، اشتہاری بورڈز اور کمزور عمارتوں سے دور رہیں۔
ترجمان پی ڈی ایم اے کے مطابق پروونشل ایمرجنسی آپریشن سنٹر 24 گھنٹے فعال ہے اور عوام کسی بھی ہنگامی صورتحال میں ٹول فری ہیلپ لائن 1700 پر رابطہ کر سکتے ہیں۔
