انڈر 19 تین ملکی ایک روزہ سیریز کے دوسرے میچ میں پاکستان نے افغانستان کو سنسنی خیز مقابلے کے بعد ایک وکٹ سے شکست دیدی ۔
ہرارے میں کھیلےگئے انڈر 19تین ملکی سیریز کے دوسرے میچ میں پاکستان نے ٹاس جیت کر فیلڈنگ کا فیصلہ کیا، افغانستان کی ٹیم مقررہ 50 اوورز 226 رنز بناکر آؤٹ ہوگئی ۔
افغانستان کی جانب سے عثمان سعادت نے 75 اور کپتان محبوب خان نے 49 رنز بنائے، پاکستان کی جانب سے عثمان خان نے 4، محمد صیام اور دانیال علی نے 2، 2 کھلاڑیوں کو آؤٹ کیا ۔
جواب میں پاکستان کےکپتان فرحان یوسف کے 65 رنز کے علاوہ وکٹ پر کوئی بیٹر زیادہ دیر نہ ٹک سکا، لیکن وکٹ کیپر بیٹر حمزہ ظہور نے پاکستان کو مشکل ترین صورت حال سے نکالا ۔
انہوں نے پہلے دانیال خان کے ساتھ 36 رنز کی شراکت بنائی،201 پر 9 کھلاڑی آؤٹ ہوگئے لیکن حمزہ ظہور ڈٹے رہے اور تین گیندوں قبل پاکستان کو فتح دلادی ۔
انہوں نے صرف 51 گیندوں پر 8 چوکوں اور ایک چھکے کی مدد سے 68 رنز کی فاتحانہ اننگز کھیلی ، افغانستان کی جانب سے سلام خان نے 4 اور زیت اللہ شاہین نے 2 وکٹیں اپنے نام کیں ۔
