اسلام آباد: وفاقی وزیر داخلہ محسن نقوی اور وزیر مملکت طلال چوہدری نے سیف سٹی ہیڈکوارٹرز کا دورہ کیا۔
وفاقی وزیر داخلہ محسن نقوی کی زیر صدارت خصوصی اجلاس میں سیف سٹی توسیعی منصوبے پر پیش رفت کا جائزہ لیا گیا۔
اجلاس کو بریفنگ میں بتایا گیا کہ سیف سٹی توسیعی منصوبے پر مجموعی طور پر 85 فیصد کام مکمل ہوچکا ہے۔
نئے کیمروں کی تنصیب کا کام بھی 85 فیصد مکمل کرلیا گیا ہے۔
415 کلومیٹر آپٹیکل فائبر بچھا دی گئی ہے، جبکہ ڈیٹا سینٹر، سائبر آرکیٹیکچر اور سائبر سکیورٹی پر بھی 80 فیصد کام مکمل ہوچکا ہے۔
وفاقی وزیر داخلہ محسن نقوی نے سیف سٹی توسیعی منصوبہ 30 ستمبر تک مکمل کرنے کا ٹاسک دے دیا۔
انہوں نے کہا کہ ہمارا عزم اسلام آباد سیف سٹی کو جدید، سمارٹ اور ترقی یافتہ ممالک کی طرز پر عالمی معیار کا ادارہ بنانا ہے۔
محسن نقوی نے کہا کہ جدید ٹیکنالوجی سے لیس سیف سٹی نظام شہریوں کے تحفظ، مؤثر نگرانی اور فوری رسپانس کو یقینی بنائے گا۔
وزیر داخلہ نے اسلام آباد سیف سٹی کے جدید فیوژن سینٹر کو تین ماہ میں مکمل کرنے کا ٹاسک بھی دے دیا۔
انہوں نے سیف سٹی بل کو حتمی شکل دے کر جلد از جلد قومی اسمبلی میں پیش کرنے کی ہدایت کی۔
