ہنگو میں سکیورٹی فورسز نے انٹیلی جنس بیسڈ آپریشن کے دوران فتنہ الخوارج کے 7 دہشت گردوں کو ہلاک کردیا ، جبکہ کارروائی کے دوران کیپٹن حمزہ نے جامِ شہادت نوش کیا ۔
پاک فوج کے شعبہ تعلقات عامہ آئی ایس پی آر کے مطابق 7 اگست کو فتنہ الخوارج کے کارندوں کی موجودگی کی اطلاع پر ہنگو میں انٹیلی جنس بیسڈ آپریشن کیا گیا ۔ سکیورٹی فورسز نے کارروائی کے دوران خوارج کے ٹھکانے کو مؤثر انداز میں نشانہ بنایا ۔
آئی ایس پی آر کے مطابق آپریشن میں فتنہ الخوارج کے 7 دہشت گرد ہلاک ہوئے ، جبکہ ہلاک دہشت گردوں کے قبضے سے اسلحہ اور گولہ بارود بھی برآمد کیا گیا ۔ ہلاک دہشت گرد متعدد شہریوں کے قتل میں ملوث تھے ۔
شعبہ تعلقات عامہ کے مطابق کیپٹن حمزہ اپنے دستوں کی قیادت کرتے ہوئے خوارج کا مسلسل تعاقب کر رہے تھے اور جوانمردی سے لڑتے ہوئے جامِ شہادت نوش کرگئے ۔
آئی ایس پی آر کے مطابق علاقے میں ممکنہ طور پر موجود دیگر خوارج کے خاتمے کے لیے سینیٹائزیشن آپریشن جاری ہے ۔
شعبہ تعلقات عامہ کا کہنا ہے کہ ملک سے دہشت گردی کے خاتمے کے لیے مؤثر انسدادِ دہشت گردی مہم پوری رفتار سے جاری رہے گی، جبکہ بہادر جوانوں کی قربانیاں قوم کے تحفظ اور سلامتی کے عزم کو مزید مضبوط کرتی ہیں ۔
