جنوبی وزیرستان میں وانا کیڈٹ کالج پر حملہ کرنے والے 3 دہشتگردوں کے خلاف سیکیورٹی فورسز کا آپریشن جاری ہے، طلبہ کو محفوظ رکھنے کے لیے مہارت سے کام لیا جا رہا ہے،گزشتہ روز حملہ آور 2 دہشتگردوں کو ہلاک کیا گیا گیا تھا ۔
سکیورٹی ذرائع نے بتایا کہ وانا کیڈٹ کالج کے اندر موجود 3 دہشتگردوں کے خلاف آپریشن جاری ہے، تینوں دہشتگردوں کا تعلق افغانستان سے بتایا جا رہا ہے، دہشتگرد مسلسل ٹیلیفون پر افغانستان سے ہدایات لے رہے ہیں ۔
سیکورٹی ذرائع نے یہ بھی بتایا کہ دہشتگرد ایک عمارت میں چھپے ہوئے ہیں جو کہ کیڈٹس کی رہائش سے بہت دور ہے، عمارت کی کلیئرنس کو بڑی مہارت کے ساتھ سرانجام دیا جارہا ہے تاکہ کیڈٹس کی زندگی محفوظ رہ سکے اور ان کو کوئی نقصان نہ پہنچ سکے ۔
دہشتگردوں نے گزشتہ روز کالج کے مرکزی گیٹ پر بارود سے بھری گاڑی ٹکرا دی تھی، دھماکے سے کالج کا مرکزی گیٹ منہدم، قریبی عمارتوں کو بھی نقصان پہنچا ۔
پاک فوج کے جوانوں نے فوری اور جرات مندانہ کارروائی کرتے ہوئے 2 دہشت گردوں کو موقع پر جہنم واصل کر دیا تھا ۔
سکیورٹی ذرائع نے واضح کیا ہے کہ معصوم قبائلی بچوں پر حملہ اور دہشتگردوں کا اسلام سے یا پاکستان کی عوام کی خوشحالی سے کوئی تعلق نہیں، آخری دہشت گرد کے خاتمے تک فورسز کا آپریشن جاری رہے گا ۔
