سوات کے دشوار گزار پہاڑی علاقے مٹہ میں پولیس اور کاؤنٹر ٹیررازم ڈیپارٹمنٹ (سی ٹی ڈی) نے خفیہ اطلاعات پر سرچ آپریشن کیا جس کے دوران دہشتگردوں سے جھڑپ میں دو شرپسند زخمی ہو گئے جبکہ ان کے ساتھی فرار ہونے میں کامیاب ہو گئے۔
ذرائع کے مطابق یہ کارروائی تھانہ گوالیری جارگو کی پہاڑیوں میں اُس وقت شروع ہوئی جب پولیس اور سی ٹی ڈی اہلکاروں کا دہشتگردوں سے آمنا سامنا ہوا۔ مقابلے کے دوران دو دہشتگرد زخمی ہوئے، جنہیں ان کے ساتھی فرار کروا کر لے گئے۔
واقعے کے بعد سوات پولیس، ایلیٹ فورس اور سی ٹی ڈی نے علاقے میں مزید مشترکہ سرچ آپریشن شروع کر دیا ہے تاکہ فرار ہونے والے دہشتگردوں کو بھی گرفتار کیا جا سکے۔
آئی جی خیبر پختونخوا ذوالفقار حمید نے کامیاب کارروائی پر اہلکاروں کو شاباش دیتے ہوئے صوبہ بھر کی پولیس کو مزید چوکنا رہنے کی ہدایت کی۔ ان کا کہنا تھا کہ دہشتگردوں کے لیے خیبرپختونخوا میں کوئی جگہ نہیں، انہیں ہر جگہ سے نکال باہر کریں گے۔
