ٹی 20 ورلڈ کپ کے سپر ایٹ مرحلے میں آج بھارت اور آسٹریلیا کے درمیان اہم میچ ہوگا۔اس اہم ترین میچ کے دوران بارش کا امکان بھی ظاہر کیا گیا ہے اور اگر میچ واش آؤٹ ہوا تو آج آسٹریلیا باہر ہو سکتا ہے۔
آج سینٹ لوشیا میں آئی سی سی ٹی ٹوئنٹی ورلڈ کپ کے سپر ایٹ مرحلے کا نہایت ہی اہم ترین میچ میں بھارت اور آسٹریلیا کے درمیان ڈیرن سمی کرکٹ اسٹیڈیم میں کھیلا جائے گا۔یہ میچ سیمی فائنل تک رسائی کے لیے فائنل سے پہلے ہی فائنل کی حیثیت اختیار کر گیا ہے۔تاہم آج کے میچ میں محکمہ موسمیات نے بارش کی پیشگوئی بھی ہے۔ اگر یہ میچ بارش کی وجہ سے منسوخ ہوتا ہے کہ تو دونوں ٹیموں کو ایک ایک پوائنٹ ملے گا۔ یہ بارش بھارت کے لیے پلس پوائنٹ ثابت ہوگی کیونکہ بغیر کھیلے ہی بھارت کو ایک پوائنٹ ملنے سے اس کے پوائنٹس 5 ہو جائیں گے اور وہ سیمی فائنل کے لیے کوالیفائی کر جائے گا، لیکن اس کے برعکس مشکل آسٹریلیا کے لیے کھڑی ہو جائے گی۔
کینگروز جن کے ابھی تک صرف دو پوائنٹس ہیں، میچ واش آؤٹ ہونے کے باعث اس کے تین پوائنٹ ہو جائیں گے اور اس کے مستقبل کا دارومدار کل کے میچ پر ہوگا۔ اور اگر کل افغانستان نے بنگلہ دیش کو ہرا دیا تو اس کے چار پوائنٹس ہو جائیں گے جس کے نتیجے میں سابق عالمی چیمپئن ایونٹ سے باہر ہوجائے گی جبکہ اس کے ساتھ ہی افغان ٹیم سیمی فائنل کا ٹکٹ کٹوا لے گی جبکہ نتیجہ مختلف ہونے کی صورت میں افغانستان کا سیمی فائنل کھیلنے کا خواب مکمل طور پر چکنا چور ہو جائے گا اور اس کے ساتھ ہی آسٹریلیا ناک آؤٹ مرحلہ کھیلے گا۔لیکن اس کے برعکس اگر آج کی طرح کل کا میچ بھی بارش کی وجہ سے نہ ہو سکا تو پھر اس صورت میں آسٹریلیا اور افغانستان دونوں کے پوائنٹس تین تین ہو جائیں گے اور سیمی فائنل میں رسائی کے لیے فیصلہ رن ریٹ پر کیا جائے گا۔
جبکہ اس وقت پوائنٹس ٹیبل پر رن ریٹ میں آسٹریلیا افغانستان سے بہت ہی اوپر ہے اور دونوں میچز نہ ہونے کی صورت میں کینگروز بھی فائنل فور میں اپنی جگہ بنا لیں گے۔آج کے میچ کے حوالے سے آسٹریلیا اور بھارت کے ٹی ٹوئنٹی ورلڈ کپ میں باہمی مقابلوں کا اگر سابقہ ریکارڈ کو دیکھا جائے تو اس میں بھارت کا پلڑا کافی بھاری نظر آتا ہے۔اب تک دونوں ٹیموں نے میگا ایونٹ میں پانچ میچز کھیل رکھے ہیں۔ ان میں سے تین بھارت نے اپنے نام کیے جبکہ اس کے برعکس آسٹریلیا نے دو فتوحات حاصل کر رکھی ہیں۔
