وزیر دفاع خواجہ آصف کا کہنا ہے کہ عمران خان کی رہائی کا مطالبہ کرنے والے عناصر کو اسرائیل کی بھرپور حمایت حاصل ہے، اس سے ظاہر ہوتا ہےکہ بانی پی ٹی آئی اسرائیلی اثاثہ ہے، بانی پی ٹی آئی کے ذریعے وہ واحد مسلمان ایٹمی قوت کو خدا نخواستہ سر نِگوں کرنا چاہتے ہیں۔
خواجہ آصف کا مزید کہن اتھا کہ آپریشن گولڈ اسمتھ کے ریکروٹ بانی ٹی آئی عمران خان کی نجات کے لیے مہم چلا رہے ہیں۔ خواجہ آصف نے نومنتخب امریکی صدر ڈونلڈ ٹرمپ کے نامزد ایلچی رچرڈ گرینل کے بیان پر ردعمل دیتے ہوئے کہا کہ بانی پی ٹی آئی کے لیے مغرب سے آواز اٹھانے والوں پر واضح ہونا چاہیے کہ پاکستانی قوم اپنے مفادات کا تحفظ کرنا جانتی ہے، ہماری اول و آخر ترجیح صرف اور صرف پاکستان ہے۔
علاوہ ازیں دوسری جانب ن لیگ کے سینیٹر طلال چوہدری نے نجی ٹی وی سے گفتگو کرتے ہوئے کہا کہ بانی پی ٹی آئی کی رہائی کے لیے حکومت ٹرمپ انتظامیہ کے بیانات سے کوئی دباؤ محسوس نہیں کر رہی، جب یہ لوگ حکومتی نمائندے کے طور پر بات کریں گے تو پاکستانی حکومت بھی جواب دے گی۔
ان کا کہنا تھا کہ یہ کیسی بات ہے پہلے امریکا بانی پی ٹی آئی کو آزادی دلوائے گا اور پھر بانی پی ٹی آئی قوم کو امریکا سے آزاد کروائیں گے۔
