حکومت سندھ نے ٹیکس چوروں کےنام اخبارات میں شائع کرنےکافیصلہ کرلیا ہے۔
سندھ کے سینئر وزیر شرجیل انعام میمن کی زیر صدارت اجلاس ہوا جس میں ایکسائز، ٹیکسیشن و نارکوٹکس کنٹرول کے سیکرٹری سلیم راجپوت اور دیگر نے شرکت کی۔اجلاس میں شرجیل میمن نے کہا تھا کہ ٹیکس چور ملکی خوشحالی کے سب سے بڑھے دشمن ہیں، ان کو بخشا نہیں جائے گا، اس لئے ٹیکس چوروں کے نام اخبارات میں شائع کیے جائیں گے۔سینئر صوبائی وزیر کے مطابق ٹیکس چوروں کے اکاؤنٹ بند کرنے کے لیے بھی اقدامات کریں گے۔
شرجیل انعام میمن نے اجلاس میں صوبے میں منشیات فروشوں کے خلاف کریک ڈاؤن کو سراہتے ہوئے منشیات فروشوں کے خلاف کریک ڈاؤن میں مزید تیزی لانے کی ہدایات جاری کی ہیں۔صوبائی وزیر کے مطابق منشیات فروش ملک و قوم کے مستقبل کے دشمن ہیں، ان منشیات فروشوں کے ساتھ کسی بھی قسم کی نرمی نہیں برتی جائے گی۔ان کا کہنا تھا پولیس کے ذہین،قابل افسران اور جوانوں کو ڈیپوٹیشن پر محکمہ ایکسائز میں لایا جائے گا، ابتدائی طور پر کراچی اور حیدرآباد میں افسران ڈیپوٹیشن پر ایکسائز میں لائے جائیں گے۔
شرجیل میمن کے مطابق منشیات کے خلاف کارروائیوں کو مزید تیز کرنا ہے، جبکہ متعلقہ ادارے تعاون کریں گے، منشیات فروشوں کی پراسیکیوشن اور انویسٹی گیشن مضبوط کی جائے۔اس اجلاس میں بہترین کارکردگی والے افسران اور مخبروں کو انعامات دینے کا فیصلہ بھی کیا گیا۔اس کے علاوہ اس اجلاس میں گاڑیوں کی رجسٹریشن اور منتقلی بائیومیٹرک کے تحت کرنے کی تجویز دی گئی اوراس کے ساتھ ہی محکمہ ایکسائز سے متعلقہ تمام اسٹیک ہولڈرز کی شکایات کے ازالے کے لیے اقدامات کا فیصلہ کیا گیا ہے۔
