بلوچستان کےمسائل کو سیاسی مذاکرات کے ذریعے حل کرنا چاہئیں،صدر مملکت

صدرمملکت آصف علی زرداری نے کہا ہے کہ بلوچستان کے مسائل کو سیاسی مذاکرات کے ذریعے حل ہونے چاہئیں۔ 

صدرمملکت آصف علی زرداری کے مطابق صوبے کی ترقی اور خوشحالی حکومت کی اولین ترجیح ہے ، بلوچستان کو خوشحال اور مضبوط بنا کر استحکام پاکستان کیلئے موثر کردار ادا کریں گے۔صدرمملکت کا کوئٹہ میں وزیراعلیٰ بلوچستان کےعشائیہ سے خطاب میں مزید کہنا تھا کہ ہمارے دور میں اٹھارویں آئینی ترمیم پاس کی گئی جس سے تمام صوبوں کوفائدہ پہنچا، اس لئے کوشش ہے بلوچستان کی ترقی اور یہاں کےعوام کیلئے زیادہ سے زیادہ کام کرسکوں۔

آصف علی زرداری کے مطابق صوبے کی بنجر زمینوں کو سیراب کرکے ان کو زرعی پیداوار میں اضافے کے قابل بنانے کی کوشش کریں گے۔اس کے ساتھ ہی بینظیر انکم سپورٹ پروگرام کو وسیع کرنے کی بھی کوشش کر رہے ہیں۔اس سے قبل آصف علی زرداری صدارت کا منصب سنبھالنےکے بعد بلوچستان کے پہلے دورہ پر کوئٹہ پہنچے تو گورنر ، وزیراعلیٰ اور دیگر اعلیٰ حکام نے ان کا خوش دلی سے استقبال کیا ۔ وزیراعلیٰ بلوچستان میر سرفراز بگٹی اور صوبائی وزراء نے صدر سے ملاقات کی اور صوبے میں امن و امان کی صورتحال پر بریفنگ دی گئی۔صدر مملکت سےملاقات میں نواب ثناءاللہ زہری ، صادق عمرانی ، علی مدد جتک ، ظہور بلیدی ، سردار عبد الرحمان کھیتران ، میر سلیم کھوسہ ، فیصل جمالی اور غزالہ گولہ شامل تھے ۔