پشاور (حسن علی شاہ) — پاک افغان سرحد طورخم کی بندش کے باعث خیبرپختونخوا میں مال مویشیوں کے تاجروں کو شدید مالی نقصان کا سامنا ہے۔
ذرائع کے مطابق عیدالاضحیٰ سے قبل ماضی میں خیبرپختونخوا سے بڑی تعداد میں قربانی کے جانور افغانستان برآمد کیے جاتے تھے، جس کے باعث مقامی منڈیوں میں قیمتوں میں نمایاں اضافہ دیکھنے میں آتا تھا۔ تاہم اس سال سرحدی بندش کے باعث صورتحال یکسر تبدیل ہو گئی ہے۔
پشاور کی مرکزی مال مویشی منڈیاں ویران نظر آ رہی ہیں جبکہ قربانی کے جانوروں کی وافر موجودگی کے باوجود خریداروں کی تعداد نہ ہونے کے برابر ہے۔ مہنگائی کے باعث عوام کی قوتِ خرید بھی شدید متاثر ہوئی ہے، جس کے نتیجے میں جانوروں کی قیمتیں بلند سطح پر برقرار ہیں لیکن خرید و فروخت میں واضح کمی دیکھی جا رہی ہے۔
تاجروں کے مطابق سرحدی تجارت کی بندش نے نہ صرف کاروباری سرگرمیوں کو متاثر کیا ہے بلکہ عیدالاضحیٰ کے موقع پر روایتی منڈیوں کی رونق بھی ماند پڑ گئی ہے۔
