اقوام متحدہ کی سلامتی کونسل نے گزشتہ ہفتے بلوچستان میں ہونے والے دہشت گرد حملوں کی شدید الفاظ میں مذمت کرتے ہوئے کہا ہے کہ ان حملوں کے ذمہ داروں کو ہر صورت قانون کے کٹہرے میں لایا جائے۔
سلامتی کونسل کی جانب سے جاری کردہ بیان میں کہا گیا ہے کہ دہشت گردی چاہے کسی بھی شکل میں ہو، عالمی امن اور سلامتی کے لیے ایک سنگین خطرہ ہے۔ بیان میں اس بات پر زور دیا گیا کہ بلوچستان میں دہشت گرد حملوں میں ملوث عناصر، ان کے مالی معاونین اور سہولت کاروں کو انصاف کے کٹہرے میں لانا ناگزیر ہے۔
بیان میں اقوام متحدہ کے رکن ممالک سے اپیل کی گئی ہے کہ وہ عالمی قوانین اور سلامتی کونسل کی قراردادوں کے تحت پاکستان کے ساتھ تعاون کریں تاکہ دہشت گردی کے خاتمے کو یقینی بنایا جا سکے۔
سلامتی کونسل نے مزید کہا کہ تمام ریاستوں کو اقوام متحدہ کے چارٹر اور بین الاقوامی قوانین کے تقاضوں کے مطابق دہشت گردی کی وجہ سے پیدا ہونے والے امن اور استحکام کے مسائل کا ہر ممکن طریقے سے مقابلہ کرنا چاہیے۔
