وفاقی وزیر داخلہ محسن نقوی کا جنوبی وزیرستان میں خوارجیوں کی دراندازی ناکام بنانے پر پاک فوج کو خراجِ تحسین

وفاقی وزیرداخلہ محسن نقوی نے جنوبی وزیرستان کے علاقے میں خوارجیوں کی دراندازی کی کوشش ناکام بنانے پر پاک فوج کو خراج تحسین پیش کرتے ہوئے پاک فوج کی پیشہ وارانہ صلاحیتوں کو سراہا ہے۔
وزیرداخلہ نے کہا ہے کہ پاک فوج نے بروقت کارروائی کرکے خوارجیوں کے مذموم عزائم کو ناکام بنایا۔ پاک فوج کے بہادر جوانوں کو سلام پیش کرتا ہوں۔ وزیرداخلہ محسن نقوی نے دراندازی کی ناکامی کے بعد افغان طالبان کی سول آبادی پر فائرنگ کے واقعے کی مذمت کی اورزخمیوں کی جلد صحتیابی کیلئے دعا کی۔
محسن نقوی کا کہنا ہے کہ پاک فوج نے موثر کارروائی کرتے ہوئے افغان طالبان رجیم کو بلااشتعال فائرنگ کامنہ توڑ جواب دیا۔ قوم کو پاک فوج کی پیشہ وارانہ مہارت اور جرات پر فخر ہے۔ پوری قوم پاک فوج کے شانہ بشانہ کھڑی ہے۔