پشاور (شوبز ڈیسک): ریڈیو، اسٹیج، ٹیلی ویژن اور عوامی محافل میں ساٹھ سال تک پشتو زبان و ثقافت کی خدمت کرنے والے معروف فنکار استاد احمد گل نے کہا ہے کہ ان کی طویل فنی خدمات کو حقیقی معنوں میں صرف خیبر ٹیلی ویژن نے تسلیم کیا ہے۔
اخبار خیبر کو دیے گئے انٹرویو میں انہوں نے کہا کہ انہوں نے اپنی زندگی کا بڑا حصہ اپنی مادری زبان پشتو کے فروغ اور فنی خدمات کے لیے وقف کیا، اور حکومت کی جانب سے انہیں تمغہ امتیاز بھی دیا گیا، تاہم یہ اعزاز ان کی معاشی مشکلات کو حل نہ کر سکا۔
استاد احمد گل کے مطابق یہ اعزاز ان کے لیے قابلِ فخر ضرور ہے لیکن اسے انہوں نے گھر کے ایک کونے میں بطور یادگار سجا رکھا ہے، کیونکہ عملی سطح پر اس سے ان کی زندگی میں کوئی خاطر خواہ بہتری نہیں آئی۔
انہوں نے کہا کہ خیبر ٹیلی ویژن وہ واحد ادارہ ہے جس نے نہ صرف ان کی فنی خدمات کو سراہا بلکہ ان کی فلاحی تنظیم "خودمختار ساوی” کے ذریعے انہیں خطیر مالی معاونت بھی فراہم کی۔
ان کا کہنا تھا کہ اگر خیبر ٹیلی ویژن نہ ہوتا تو ان جیسے سینئر فنکاروں کی خدمات سے نئی نسل لاعلم رہتی، اور ان کے فن کو وہ پذیرائی نہ ملتی جس کے وہ حق دار تھے۔
