سوئس حکومت نے ایران اور امریکا کے درمیان ہونے والے مذاکرات کے ملتوی ہونے کی تصدیق کر دی ہے۔ سوئس وزارتِ خارجہ کے مطابق برجنسٹاک شہر میں آج ہونے والی شیڈول مذاکراتی نشست اب نہیں ہوگی۔
وزارتِ خارجہ کی جانب سے جاری بیان میں کہا گیا ہے کہ ایران اور امریکا کے درمیان مفاہمتی یادداشت پر عملدرآمد کے حوالے سے ابتدائی مذاکرات آج منعقد ہونا تھے، تاہم بعض وجوہات کے باعث فریقین کے درمیان یہ اہم ملاقات ملتوی کر دی گئی ہے۔
بیان میں مزید کہا گیا ہے کہ مذاکرات کی نئی تاریخ کا اعلان بعد میں کیا جائے گا۔
اس سے قبل امریکا کے نائب صدر جے ڈی وینس اور قطری حکام نے بھی سوئٹزرلینڈ کا اپنا مجوزہ دورہ ملتوی کر دیا تھا، جس کے بعد مذاکرات کے انعقاد پر شکوک پیدا ہوگئے تھے۔
یاد رہے کہ گزشتہ روز ایران کی وزارتِ خارجہ کے ترجمان نے کہا تھا کہ مفاہمتی یادداشت پر دستخط کے بعد سوئٹزرلینڈ میں مزید کسی معاہدے پر دستخط کی ضرورت نہیں رہی، تاہم ایرانی مذاکراتی ٹیم سوئٹزرلینڈ میں موجود رہے گی اور آئندہ پیش رفت کا انتظار کرے گی۔
