سلہٹ ٹیسٹ فیصلہ کن مرحلے میں داخل ہو گئی، 437 رنز کا تعاقب کرتے ہوئے پاکستان کو 121 رنز اور بنگلہ دیش کو 3 وکٹوں کی ضرورت ہے جبکہ پانچویں اور آخری روز کا کھیل ابھی باقی ہے ۔
سلہٹ کرکٹ گراونڈ میں کھیلے جارہے دوسرے ٹیسٹ میچ میں 437 رنز کے ہدف کے تعاقب میں پاکستان نے چوتھے دن کھیل کے اختتام پر 7 وکٹ پر 316 رنز بنا لیے، محمد رضوان 75 اور ساجد خان 8 رنز بنا کر ناٹ آؤٹ ہیں، پاکستان کو جیت کے لیے 121 رنز اور بنگلا دیش کو 3 وکٹ درکار ہیں ۔
پاکستان نے دوسری اننگز کا آغاز کیا تو 27 کے مجموعی سکور پر عبد اللہ فضل 6 رنز بنا کر آوٹ ہوئے، اس کے بعد اذان اویس بھی 41 کے مجموعے 21 رنز کی اننگز کھیل کر پویلین لوٹ گئے ۔
دو وکٹ کے نقصان کےبعد بابر اعظم اور شان مسعود نے اچھی شراکت قائم کی تاہم بابر اعظم 47 رنز بنا کر تیج الاسلام کا شکار بن گئے جبکہ شان مسعود 71 رنز بنا کر آؤٹ ہوئے ۔
بنگلہ دیش کی جانب سے تیج الاسلام 4، ناہید رانا 2 اور مہدی حسن مرزا نے ایک وکٹ حاصل کی ۔
اس سے قبل بنگلا دیش نے پہلی اننگز میں 278 رنز بنائے جس کے جواب میں پاکستان ٹیم 232 رنز بناکر آؤٹ ہوگئی اور یوں میزبان ٹیم کو 46 رنز کی برتری حاصل ہو گئی ۔
بنگلادیشی ٹیم نے اپنی دوسری اننگز میں 390 رنز بنائے اور 46 رنز کی برتری کے ساتھ پاکستان کو جیت کے لیے 437 رنز کا ہدف دیا، جس کے تعاقب میں پاکستان کی دوسری اننگز میں بیٹنگ جاری ہے ۔
