اسلام آباد – یومِ آزادی اور "معرکہ حق” میں تاریخی فتح کی خوشی میں آج اسلام آباد میں شاندار تقریب کا انعقاد کیا جا رہا ہے۔
ذرائع کے مطابق مرکزی تقریب آج رات 8 بجے جناح اسپورٹس اسٹیڈیم اسلام آباد میں منعقد ہوگی۔ اس موقع پر صدرِ پاکستان مہمانِ خصوصی ہوں گے جبکہ وزیرِ اعظم اور تینوں مسلح افواج کے سربراہان بھی تقریب میں شریک ہوں گے۔
قومی اور غیر ملکی شخصیات کی بڑی تعداد میں شرکت متوقع ہے۔ مرکزی تقریب میں خصوصی ملی اور ثقافتی پروگرام پیش کیے جائیں گے۔ تینوں مسلح افواج کی شاندار پریڈ اور فضائی مظاہرہ بھی تقریب کا حصہ ہوں گے۔
ذرائع کا کہنا ہے کہ وزیرِ اعظم "معرکہ حق” میں فتح کی یاد میں معرکہ حق مونومنٹ کی رونمائی بھی کریں گے۔ آزادی کی تقریبات میں دوست ممالک ترکیے اور آذربائیجان کے فوجی دستے بھی شریک ہو رہے ہیں۔
آرمی اسکول آف میوزک کی خصوصی بینڈ پرفارمنس بھی اس گرینڈ تقریب کا حصہ ہوگی۔ عوام کا جوش و خروش اپنے عروج پر ہے اور ہر طرف قومی جذبے کی فضا قائم ہے۔
یہ شاندار تقریب براہِ راست پی ٹی وی سے نشر کی جائے گی تاکہ پوری قوم اس تاریخی لمحے کو دیکھ سکے۔
