بلوچستان حکومت نے صوبہ بھر میں رات کے وقت پبلک ٹرانسپورٹ کی گاڑیوں کی نقل و حرکت پر پابندی عائد کر دی ہے، پابندی شام 5 سے صبح 5 بجے تک عائد کی گئی ہے ۔
کوئٹہ: گزشتہ روز بلوچستان کے سیکریٹری ٹرانسپورٹ محمد حیات کاکڑ کی زیر صدارت اہم اجلاس ہوا جس میں فیصلہ کیا گیا کہ صوبہ بھر میں شام کے بعد پبلک ٹرانسپورٹ کی گاڑیوں پر پابند ہوگی ۔
فیصلے کے مطابق صوبے بھر کی شاہراہوں پر شام 5 بجے سے صبح 5 بجے تک عوامی ٹرانسپورٹ کو چلانے کی اجازت نہیں ہوگی، پابندی کی خلاف ورزی کرنے والی کمپنیوں کے روٹ پرمٹ منسوخ کر دیے جائیں گے ۔
اجلاس میں ٹرانسپورٹرز ایسوسی ایشنز کے نمائندے بھی شریک ہوئے، اجلاس میں یہ طے پایا کہ محکمہ داخلہ کی ہدایات پر عمل درآمد کرتے ہوئے رات کے سفر پر پابندی کو سختی سے نافذ کیا جائے گا ۔
محمد حیات کاکڑ نے کہا کہ صوبے کے تمام ڈپٹی کمشنرز کو ہدایت دی گئی ہے کہ وہ رات کے وقت عوامی ٹرانسپورٹ چلنے سے روکنے کے لیے اقدامات کریں ۔
ٹرانسپورٹرز کو یہ ہدایت دی گئی ہے کہ وہ اپنی گاڑیوں میں ٹریکرز نصب کریں، سیکیورٹی گارڈ تعینات کریں اور حکومت کی سمگلنگ مخالف پالیسیوں پر عمل کو یقینی بنائیں ۔
