وزیر اعلی خیبر پختونخوا علی امین گنڈاپور کی میزبانی میں امن و امان سے متعلق دوسرا مشاورتی جرگہ آج وزیر اعلی ہاوس پشاور میں منعقد ہوا، قبائلی عمائدین نے مطالبہ کیا کہ حکومت ہمیں قبائلی علاقوں میں امن بحال کرے، ہم ہر قسم کے تعاون کیلئے ہمہ وقت تیار ہیں ۔
پشاور: وزیراعلیٰ ہاوس میں منعقدہ جرگے میں جرگے میں ضلع باجوڑ اور مہمند کے عمائدین اور منتخب عوامی نمائندوں نے کثیر تعداد میں شرکت کی ۔
جرگہ میں مشیر اطلاعات بیرسٹر سیف، سینیٹر نور الحق قادری، چیف سیکرٹری اور آئی جی پی کے علاؤہ متعلقہ کمشنرز، ڈپٹی کمشنرز اور پولیس حکام بھی جرگے میں شریک تھے ۔
قبائلی عمائدین نے گرینڈ میں اپنی سفارشات پیش کرتے ہوئے کہا کہ ہم امن چاہتے ہیں، حکومت ہمیں امن دے، ہم ہر قسم کے تعاون کے لیے تیار ہیں ۔
قبائلی عمائدین کا کہنا تھا کہ دہشتگردی کے خلاف سب متحد ہیں ، دہشتگرد سب کے دشمن ہیں، آپریشن اور نقل مکانی قابل قبول نہیں ہے ۔
انہوں نے کہا کہ دہشتگردی کے مستقل خاتمے کے لیے وفاقی اور صوبائی حکومتوں ، قبائلی عمائدین سمیت تمام سٹیک ہولڈرز پر مشتمل وسیع البنیاد اور با اختیار جرگہ تشکیل دیا جائے ، جو افغان حکومت اور عوام سے بامقصد مذاکرات کرے ۔
قبائلی عمائدین کا مزید کہنا تھا کہ مقامی جرگوں کی کاروائی ایک نیک شگون ہے۔ اسے مزید با مقصد بنایا جائے تاکہ اِس کا اچھا نتیجہ دوسرے علاقوں کے لئے بھی مفید ثابت ہو ۔
