آپریشن "سندور” کے نام پر بھارت کی طرف سے پھیلایا گیا جھوٹا بیانیہ ایک بار پھر دنیا کے سامنے بے نقاب ہو گیا، جب آئی ایس پی آر نے پیشہ ورانہ انداز میں ناقابلِ تردید شواہد پیش کر کے بھارتی پروپیگنڈے کا پول کھول دیا۔ بھارتی میڈیا نے اس نام نہاد آپریشن کو بنیاد بنا کر جو جھوٹی داستانیں تراشیں، وہ نہ صرف فیکٹ چیک اداروں کی زد میں آئیں بلکہ بین الاقوامی برادری میں بھارت کی رہی سہی ساکھ کو بھی نقصان پہنچا۔
گودی میڈیا جس میں این ڈی ٹی وی، نیوز 18 اور کئی دیگر چینلز شامل ہیں نے دعویٰ کیا کہ بھارت نے پاکستان کے دو F-17 اور ایک ایف 16 طیارہ مار گرایا اور ایک پاکستانی پائلٹ کو گرفتار کیا۔ ان جھوٹی خبروں کو پرائم ٹائم میں پیش کیا گیا اور گھنٹوں اسٹوڈیوز میں ان پر بحث کی جاتی رہی۔ مگر جلد ہی عالمی میڈیا اور فیکٹ چیک اداروں، بشمول رائٹرز، نے ان جھوٹے دعوؤں کو بے نقاب کر دیا۔
بات یہیں ختم نہیں ہوئی۔ بھارتی میڈیا نے ڈیپ فیک ویڈیوز بنا کر یہ تاثر دینے کی کوشش کی کہ ڈی جی آئی ایس پی آر پاکستانی نقصانات کے بارے میں وضاحت دے رہے ہیں، جب کہ ایسی کوئی بات نہ تھی۔ یہ ویڈیوز جھوٹ اور فریب کا نمونہ تھیں جنہیں بین الاقوامی سطح پر مسترد کر دیا گیا۔
حقیقت یہ ہے کہ بھارتی میڈیا نے افواہوں، جھوٹ، اور ڈرامے کی لکیر کو مکمل طور پر مٹا دیا ہے۔ ایک لمحے کے لیے یہ افواہ بھی اڑائی گئی کہ پاکستان کے جوہری ذخائر پر میزائل حملہ کیا گیا ہے، لیکن بین الاقوامی جوہری توانائی ایجنسی نے اس کی سختی سے تردید کی اور مودی حکومت کے جھوٹ کو بے نقاب کر دیا۔
بھارتی بحریہ کی جانب سے کراچی بندرگاہ پر "حملے” کا دعویٰ بھی بغیر کسی ثبوت کے کیا گیا۔ نہ کوئی سیٹلائٹ امیج فراہم کی گئی، نہ کوئی قابلِ اعتماد بین الاقوامی ادارہ اس کی تصدیق کے لیے سامنے آیا۔ یہ سب محض شور اور قوم پرستی کو بھڑکانے کی ایک کوشش تھی۔
گودی میڈیا نے پاکستان کے آرمی چیف جنرل عاصم منیر کے خلاف ایک فرضی بغاوت کی کہانی بھی گھڑ لی، جو کہ سراسر لغو اور بے بنیاد تھی۔ تجزیہ کاروں کے مطابق بھارتی میڈیا نے اپنے عوام کو سچ بتانے کے بجائے حکومت کی نااہلی اور انٹیلیجنس کی ناکامی کو چھپانے کے لیے جھوٹ کا سہارا لیا۔
اس تمام تر صورتحال میں پاکستان نے پیشہ ورانہ سنجیدگی اور تدبر کا مظاہرہ کیا۔ آئی ایس پی آر نے واضح، مکمل، اور بروقت شواہد کے ساتھ حقائق دنیا کے سامنے رکھے۔ ڈی جی آئی ایس پی آر نے پاک فضائیہ اور پاک بحریہ کے سینیئر حکام کے ساتھ تفصیلی پریس بریفنگز میں ریڈار لاگز، پروازوں کے ڈیٹا، سیٹلائٹ تصاویر، اور جسمانی شواہد پیش کیے۔
پاکستان نے بین الاقوامی میڈیا کو مبینہ حملوں کی جگہوں تک رسائی دی، اور تحقیقاتی اداروں کو خوش آمدید کہا۔ یہ شفافیت نہ صرف پاکستان کے مؤقف کو مضبوط کرتی ہے بلکہ عالمی سطح پر اس کی ساکھ کو بھی مستحکم کرتی ہے۔
پہلگام واقعے کے بعد، آئی ایس پی آر نے نہایت ذمہ داری سے بیان دیا کہ اگر پاکستان پر کوئی جارحیت کی گئی یا جنگ مسلط کرنے کی کوشش ہوئی تو جواب فوری، فیصلہ کن اور تباہ کن ہوگا۔
سیاسی و دفاعی ماہرین اس بات پر متفق ہیں کہ بھارت نے ہائبرڈ وار فیئر کے دور میں فیک نیوز کو بطور ہتھیار استعمال کرنے کی کوشش کی، مگر پاکستان نے سچائی، نظم و ضبط، اور پیشہ ورانہ حکمتِ عملی سے اس پروپیگنڈے کو زائل کر دیا۔
بین الاقوامی مبصرین نے پاکستان کی حکمتِ عملی، ذمہ دارانہ رویے، اور سچائی پر مبنی مؤقف کی کھلے دل سے تعریف کی۔ سچ کی طاقت ایک بار پھر غالب آئی، اور بھارت کی جھوٹی مہم، اس کے گودی میڈیا کے ساتھ، دنیا کے سامنے ناکام ہو گئی۔
