پشاور (حسن علی شاہ) — خیبر ٹیلی ویژن نیٹ ورک کے تمام چینلز کی ماہِ رمضان کے حوالے سے خصوصی نشریات بفضلِ تعالیٰ تیسرے عشرے میں داخل ہو چکی ہیں۔ نیٹ ورک کے اردو، پشتو اور ہندکو زبانوں پر مشتمل تینوں چینلز دنیا بھر میں مقیم لاکھوں ناظرین کے لیے ماہِ صیام کے دوران ایمان افروز اور معلوماتی دینی پروگرام پیش کر رہے ہیں۔
پشاور اسٹیشن سے لبیک یا رمضان، میاشت د برکتونو اور دین فطرت کے عنوان سے پروگرام نشر کیے جا رہے ہیں، جبکہ کے ٹو اسلام آباد سے رمضان شادمان اور متحدہ عرب امارات کے شہر شارجہ سے اوورسیز پاکستانیوں کے لیے خصوصی شوز بھی پیش کیے جا رہے ہیں۔
ان پروگراموں میں تلاوتِ قرآنِ پاک، ترجمہ و تفسیر، اسلامی تاریخ کے اہم واقعات، حمد و نعت اور ماہِ رمضان کی فضیلت سے متعلق خصوصی گفتگو شامل ہوتی ہے۔ اس کے علاوہ جید علمائے کرام، دینی اسکالرز اور زندگی کے مختلف شعبوں سے تعلق رکھنے والی رول ماڈل شخصیات کو بھی مدعو کیا جاتا ہے۔
پشاور سے میزبانوں میں مینا شمس، ماریہ خان، جمشید علی خان، زکی الرحمن اور امین مشال شامل ہیں، جبکہ اسلام آباد سے عارف قاضی محمود، ردا عمران، حماد اور مشی خان میزبانی کے فرائض انجام دے رہے ہیں۔
خیبر ٹیلی ویژن نیٹ ورک کی یہ بابرکت اور مستند دینی معلومات پر مبنی نشریات پاکستان سمیت دنیا کے مختلف ممالک میں مقیم اوورسیز پاکستانی بھی باقاعدگی سے دیکھ رہے ہیں اور ان پروگراموں کو سراہا جا رہا ہے۔
