پبی: پاکستان اور چین کی پیپلز لبریشن آرمی کی مشترکہ عسکری مشق "وارئیر 8” کا آغاز 21 نومبر 2024 کو نیشنل کاؤنٹر ٹیرارزم سنٹر پبی میں شاندار افتتاحی تقریب کے ساتھ ہوا۔ یہ مشق انسداد دہشت گردی کی تربیت پر مرکوز ہے اور اس میں دونوں ممالک کے فوجی دستے تین ہفتوں تک مختلف آپریشنز کی مشترکہ مشقیں کریں گے۔
چین کے پیپلز لبریشن آرمی کے فوجی دستے 18 نومبر کو پاکستان پہنچے اور مشق کی تیاریوں کا آغاز کر دیا گیا تھا۔ یہ مشترکہ مشق پاکستان اور چین کے درمیان سالانہ بنیادوں پر ہونے والی باہمی فوجی مشقوں کا آٹھواں ایڈیشن ہے۔ مشق کا مقصد دونوں ممالک کے فوجیوں کو ایک ساتھ کام کرنے کی مہارت سکھانا، پیشہ ورانہ تربیت کو مزید بہتر بنانا اور باہمی تعاون کو مضبوط کرنا ہے۔
افتتاحی تقریب میں اسلحہ کی نمائش اور انفرادی و ٹیم سطح کی ٹریننگ کا مظاہرہ کیا گیا۔ اس کے علاوہ، کلیئرنس آپریشنز، گن فائر، ڈرون ٹریننگ، سنائپر ٹریننگ اور کمپنی سطح پر فوجی تربیت کی مشقوں نے تقریب میں خاص توجہ حاصل کی۔
اس مشق کے دوران دونوں ممالک کے فوجی افسران اور اہلکار ایک دوسرے کے ساتھ مل کر دہشت گردی کے خلاف مؤثر کارروائی کرنے کی مہارتیں سیکھیں گے، جو کہ عالمی سطح پر بڑھتے ہوئے دہشت گردی کے خطرات سے نمٹنے میں اہم کردار ادا کرے گا۔ اس مشق میں چین کی پیپلز لبریشن آرمی کے علاوہ پاکستان کی افواج بھی اہم کردار ادا کر رہی ہیں۔
پاکستان اور چین کے درمیان اس طرح کی مشترکہ مشقوں کا مقصد نہ صرف فوجی تعلقات کو مستحکم کرنا ہے بلکہ عالمی امن کے لئے دونوں ممالک کے عزم کو بھی مزید اجاگر کرنا ہے۔
