پشاور (خصوصی رپورٹر): پختونخوا قومی جرگہ کے سربراہ خالد ایوب نے اعلان کیا ہے کہ پٹرولیم مصنوعات کی قیمتوں میں اضافے، مہنگائی اور بڑھتی ہوئی لاقانونیت کے خلاف 4 اپریل بروز ہفتہ سہ پہر تین بجے شعبہ بازار چوک سے ایک پرامن احتجاجی ریلی نکالی جائے گی۔
انہوں نے بتایا کہ اس ریلی میں ٹرانسپورٹرز، تاجر برادری اور مختلف شعبہ ہائے زندگی سے تعلق رکھنے والے افراد بڑی تعداد میں شرکت کریں گے۔
خالد ایوب کا کہنا تھا کہ عوام مزید ظالمانہ حکومتی فیصلے برداشت نہیں کریں گے۔ انہوں نے حکومت پر زور دیا کہ وہ اپنے شاہانہ اخراجات اور کرپشن کو ختم کرے اور عوام کو قربانی کا بکرا بنانے سے گریز کرے۔
انہوں نے مزید کہا کہ یہ احتجاج عوام کے حقوق کے لیے ایک پرامن آواز ہوگا اور اس کا مقصد حکومتی پالیسیوں پر نظرثانی کے لیے دباؤ ڈالنا ہے۔
