پشاور: گورنر خیبرپختونخوا فیصل کریم کنڈی نے صوبے کی ترقی اور عوام کی بہتری کے لیے بھرپور کردار ادا کرنے کے عزم کا اظہار کیا۔
گورنر خیبرپختونخوا نے کہا ہے کہ اس سلسلے میں جو ممکن ہوا وہ ضرور کریں گے۔
فیصل کریم کنڈی پشاور کے باچا خان انٹرنیشنل ایئرپورٹ پر کوئٹہ کے لیے ساؤتھ ایئر کی پروازوں کے آغاز کی افتتاحی تقریب سے خطاب کررہے تھے۔
گورنر نے کہا کہ خیبرپختونخوا کی ترقی کے لیے تمام سیاسی جماعتوں کے مثبت اقدامات کی حمایت کریں گے۔
گورنر خیبرپختونخوا نے ساؤتھ ایئر انتظامیہ کا شکریہ ادا کرتے ہوئے کہا کہ پشاور سے کوئٹہ کے لیے فضائی سروس کا آغاز خوش آئند ہے۔
انہوں نے کہا کہ ساؤتھ ایئر کے ساتھ چترال، ڈی آئی خان اور لاہور کے لیے بھی پروازیں شروع کرنے پر بات ہوئی ہے۔
فیصل کریم کنڈی نے کہا کہ ساؤتھ ایئر کی فضائی سروس سے عوام کو بہتر سفری سہولیات میسر آئیں گی اور مشکلات میں کمی آئے گی۔
ساؤتھ ایئر کی ٹیم صوبے میں فضائی رابطوں کے فروغ کے لیے بھرپور کوششیں کر رہی ہے۔
گورنر خیبرپختونخوا نے ساؤتھ ایئر انتظامیہ اور پوری ٹیم کے لیے نیک خواہشات کا اظہار کیا۔
