لاہور میں فیروز پور روڈ پر کاہنہ کے علاقے میں ایک گھر کے اندر قائم ٹیوشن سینٹر کی چھت گرنے کے واقعے میں 14 بچے جاں بحق جبکہ متعدد زخمی ہو گئے ہیں، وزیراعظم محمد شہباز شریف نے کاہنہ میں ٹیوشن سینٹر کی چھت گرنے کے افسوسناک حادثے پر قیمتی جانوں کے ضیاع پر گہرے دکھ اور رنج کا اظہار کیا ہے ۔
لاہور: وزیر صحت پنجاب کے مطابق حادثے میں جاں بحق بچوں کی تعداد 14 ہو گئی ہے، ریسکیو حکام نے بتایا کہ حادثے میں خاتون ٹیچر سمیت 20 سے 25 افراد ٹیوشن سینٹر میں موجود تھے، زیادہ تر بچے کم عمر تھے، اور امدادی کارروائیاں جاری ہیں ۔
علاقہ مکینوں کے مطابق عمارت میں صبح کے اوقات میں سکول بھی چلتا تھا جبکہ بچے اکیڈمی میں ٹیوشن کے لیے موجود تھے، پولیس کے مطابق ٹیوشن سینٹر کی بالائی منزل پر تعمیراتی کام جاری تھا، گراؤنڈ فلور پر بچے موجود تھے، واقعے کے بعد گھر کے مالک سمیت 2 افراد کو حراست میں لے لیا گیا ہے ۔
ریسکیو حکام کے مطابق جاں بحق ہونے والوں میں 7 سالہ ماہ نور فاروق، 7 سالہ رمشا عاطف، 5 سالہ مرتضیٰ عاطف، 9 سالہ غلام نبی، 6 سالہ تابشہ شہزاد، 16 سالہ خدیجہ دختر وسیم، 6 سالہ سلمان ولد وسیم اور 8 سالہ فواد ولد عابد شامل ہیں ۔
ٹی ایچ کیو ہسپتال کاہنہ کے مطابق حادثے میں زخمی ہونے والے 6 بچوں کی حالت مستحکم ہے، زخمیوں میں 8 سالہ ابیہا، 10 سالہ فاریہ، 11 سالہ مرتضٰی، 8 سالہ ایان، 7 سالہ رابعہ اور 30 سالہ حمیدہ ریحان شامل ہیں ۔
وزیراعلیٰ پنجاب کا واقعے کا نوٹس: ۔
دوسری جانب وزیراعلیٰ پنجاب مریم نواز نے چھت گرنے کے واقعے کا نوٹس لیتے ہوئے متعلقہ حکام سے حادثے کی رپورٹ طلب کرلی، وزیراعلیٰ مریم نواز نے زخمی بچوں کو بہترین طبی سہولتیں فراہم کرنے کی بھی ہدایت کی ہے ۔
وزیراعظم شہبازشریف کا حادثے پر گہرے دکھ اور رنج کا اظہار: ۔
وزیراعظم محمد شہباز شریف نے کاہنہ میں ٹیوشن سینٹر کی چھت گرنے کے افسوسناک حادثے پر قیمتی جانوں کے ضیاع پر گہرے دکھ اور رنج کا اظہار کیا ہے ۔
وزیراعظم نے حادثے میں بچوں کے جاں بحق ہونے پر اظہار افسوس کرتے ہوئے جاں بحق افراد کے درجات کی بلندی اور لواحقین کے لیے صبر جمیل کی دعا کی، انہوں نے زخمی ہونے والوں کی جلد صحت یابی کی دعا کرتے ہوئے انہیں ہر ممکن طبی امداد فراہم کرنے کی ہدایت بھی جاری کی ۔
