ویسٹ انڈیز نے دوسرے ٹی 20 میچ میں پاکستانی ٹیم کو سنسنی خیز مقابلے کے بعد 2 وکٹوں سے ہراکر سیریز 1-1 سے برابر کر دی، پاکستان کے 134 رنز کا ہدف میزبان ٹیم نے آخری گیند پر پورا کرکے کامیابی سمیٹی ۔
امریکی ریاست فلوریڈا کے شہر لاوڈرہل میں کھیلے گئے سیریز کے دوسرے میچ میں پاکستان نے پہلے بیٹنگ کرتے ہوئے مقررہ اوورز میں 9 وکٹوں کے نقصان پر 133 رنز بنائے ۔
پاکستان کی جانب سے حسن نواز 40 اور سلمان آغا 38 رنزبناکر نمایاں رہے جبکہ فخرزمان 20 ،حسن علی 8،صائم ایوب صرف 7 رنز بنا کر آوٹ ہوئے،محمد حارث صرف 4 ،محمدنواز 2 اور فہیم اشرف کھاتہ کھولے بغیر آوٹ ہوئے ۔
گرین شرٹس نے مقررہ 20 اوورز میں 9 وکٹوں کے نقصان پر 133 رنز بناتے ہوئے ویسٹ انڈیز کو جیت کے لیے 134 رنز کا ہدف دیا ، ویسٹ انڈیز کی جانب سے جیسن ہولڈر نے 4 وکٹیں حاصل کیں ۔
میزبان ٹیم نے 20ویں اوور کی آخری گیند پر ہدف حاصل کیا، جیسن ہولڈر نے شاہین شاہ آفریدی کو چوکا لگا کر ٹیم کی جیت میں اہم کردار ادا کیا اور میچ کے بہترین کھلاڑی قرار پائے ۔
پاکستان کی جانب سے محمد نواز نے 3 ، صائم ایوب 2 ، شاہین شاہ آفریدی اور سفیان مقیم نے ایک ایک وکٹ اپنے نام کی ۔
یاد رہے کہ پہلے ٹی ٹوئنٹی میچ میں پاکستان نے شاندار کارکردگی کا مظاہرہ کرتے ہوئے 14 رنز سے کامیابی سمیٹی تھی، تیسرا اور سیریز کا فیصلہ کن میچ کل کھیلا جائے گا ۔
