پشاور (شوبز رپورٹ): معروف گلوکارہ لیلیٰ خان نے کہا ہے کہ خیبر ٹیلی ویژن پشاور ان کی فنی شناخت کا بنیادی ذریعہ بنا اور ان کے شوبز کیریئر کے آغاز میں اہم کردار ادا کیا۔
اخبار خیبر سے گفتگو کرتے ہوئے لیلیٰ خان نے بتایا کہ انہوں نے اپنے شوبز سفر کا آغاز خیبر ٹیلی ویژن کے ایک ڈرامے سے کیا، تاہم زمانہ طالب علمی سے موسیقی سے خصوصی لگاؤ رکھنے کے باعث بعد میں گلوکاری کو اپنا مستقل شعبہ بنا لیا۔
انہوں نے کہا کہ وہ خیبر ٹیلی ویژن کے متعدد مقبول پروگراموں میں پرفارم کر چکی ہیں، جن میں "ستائینہ”، "شینو مینو شو”، "خیبر جنکشن”، "خیبر شو” اور "ٹنگ ٹکور” نمایاں ہیں۔
لیلیٰ خان نے بتایا کہ انہیں متحدہ عرب امارات، قطر اور کویت میں بھی اپنے فن کا مظاہرہ کرنے کا موقع ملا، جہاں شائقین نے ان کی پرفارمنس کو بھرپور پذیرائی دی۔
انہوں نے مزید کہا کہ آج وہ جس مقام پر ہیں، اس کا بڑا کریڈٹ خیبر نیٹ ورک اور اپنے اساتذہ کو جاتا ہے، جنہوں نے ان کی صلاحیتوں کو نکھارنے اور انہیں آگے بڑھنے کے مواقع فراہم کیے۔
