خیبرپختونخوا میں بلین ٹری سونامی پلس شروع کرنے کا فیصلہ کیا گیا ہے۔
خیبرپختونخوا میں موسمیاتی تبدیلی کے پیش نظر صوبہ بھر میں بلین ٹری سونامی پلس شروع کرنے کا فیصلہ کیا گیا ہے۔اس حوالے سے محکمہ جنگلات کا کہنا ہے کہ بلین ٹری سونامی کے پہلے مرحلہ کے بعد 10 بلین ٹری سونامی اور اب بلین ٹری سونامی پلس شروع کرنے کا پروگرام ترتیب دیا گیا ہے۔اس دوران صوبہ بھر میں مزید پانچ سالوں کے دوران ایک ارب سے زائد درخت لگانے سمیت خیبر پختونخوا میں ٹورازم کا سکوپ بڑھانے پر بھی کام شروع کیا جائیگا ۔
محکمہ جنگلات کی طرف سے بتایا گیا ہے کہ ضم اضلاع میں بھی مزید شجرکاری کےلیے ہنگامی بنیادوں پراقدامات شروع کئے گئے ہیں۔ اس کی وجہ سے موسمیاتی تبدیلی کے خطرات میں بھی نمایاں کمی آسکے گی۔
مزید ذرائع کا کہنا ہے کہ شجرکاری کے باعث نجی نرسریوں سے بھی پودوں کا حصول ممکن بنایا جائیگا۔ اس کے علاوہ سرکاری نرسریوں میں بھی پودے کاشت کرنےکے لئے فارسٹ ڈویژن کو احکامات جاری کئے گئے ہیں۔
ترجمان محکمہ جنگلات کے مطابق بلین ٹری سونامی پلس سے صوبے بھر کے جنگلاتی رقبے میں اضافہ ہوگا۔
